آئین کی بالا دستی اور قانون کی حکمرانی ملکی ترقی کیلئے ناگزیر ہی: اسد قیصر

ہفتہ 10 اپریل 2021 22:39

صوابی (اُردو پوائنٹ اخبارتازہ ترین - آن لائن۔ 10 اپریل2021ء) سپیکر قومی اسمبلی اسد قیصر نے کہا ہے کہ آئین کی بالا دستی اور قانون کی حکمرانی ملکی ترقی کے لیے ناگزیر ہے۔اپنے ایک بیان میں انہوں نے کہا کہ ملک کودرپیش چیلنجز سے نمٹنے کیلئے آئین پاکستان کی اصل روح کو اپنانے کی ضرورت ہے، آئین پاکستان ریاست کے ہر شہری کو یکساں حقوق فراہم کرتا ہے، آئین کے تقدس کو برقرار رکھنا ہم سب کی اولین ذمہ داری ہے۔

(جاری ہے)

سپیکر قومی اسمبلی کا کہنا تھا کہ جمہوریت کا اصل مقصد آئین کی بالادستی اور قانون کی حکمرانی ہے، جمہوری قوتوں نے ہمیشہ آئین اور جمہوریت کی بحالی کے لیے اپنی کوشش جاری رکھے ہیں، آئین کی بالادستی اورجمہوریت کی بحالی کیلئے قربانیاں دینے والے کو ہمیشہ یادرکھا جائے گا۔اسد قیصر نے کہا کہ موجودہ سیاسی قیادت کی ذمہ داری ہے کہ وہ آئین پر عمل درآمد کو یقینی بنائے، آئین کا دن منانے کا مقصد اس کی بالادستی کو برقرار رکھنا ہے۔