مریم اورنگزیب کا وزیراعظم کے دورہ کراچی اور ترقیاتی پیکج دینے پر الیکشن کمیشن سے فوری نوٹس لینے کا مطالبہ

الیکشن کمیشن عمران صاحب کو این اے 249 کے الیکشن کے دوران کراچی کا دورہ کرنے سے روکے ، ترجمان (ن)لیگ

جمعہ 16 اپریل 2021 15:39

مریم اورنگزیب کا وزیراعظم کے دورہ کراچی اور ترقیاتی پیکج دینے پر الیکشن ..

اسلام آباد (اُردو پوائنٹ اخبارتازہ ترین - این این آئی۔ 16 اپریل2021ء) پاکستان مسلم لیگ (ن) کی ترجمان مریم اورنگزیب نے وزیراعظم عمران خان کے دورہ کراچی اور ترقیاتی پیکج دینے پر الیکشن کمیشن سے فوری نوٹس لینے کا مطالبہ کردیا ۔ اپنے بیان میں انہوںنے کہاکہ الیکشن کمیشن عمران صاحب کو این اے 249 کے الیکشن کے دوران کراچی کا دورہ کرنے سے روکے ۔ انہوںنے کہاکہ ایک طرف ارکان قومی اسمبلی کو حلقے میں جانے کی اجازت نہیں تو دوسری جانب قاعدے قانون کی دھجیاں اڑاتے سلیکٹڈ وزیراعظم ترقیاتی پیکج جاری کر رہے ہیں ،تین سال عمران صاحب کو کراچی کے لئے ایک روپیہ یاد نہیں آیا اور این اے 249 کے الیکشن کے دوران 11 ارب یاد آگیا۔

انہوںنے کہاکہ عمران صاحب آپ کے پاس 11 روپیہ نہیں کراچی کے لوگوں کو گیارہ ارب کا جھوٹ کیوں بول رہے ہیں ۔

(جاری ہے)

انہوںنے کہا کہ عمران صاحب 50 لاکھ گھر اور ایک کڑوڑ گھر نوکری کے طرح اب کراچی اور سندھ کی عوام آپ کے جھانسے میں نہیں آئے گی ۔ انہوںنے کہاکہ ڈسکہ میں الیکشن کمیشن کا عملہ اغوا کرنے کے تجربے کے بعد اب کراچی میں سرکاری وسائل کا استعمال کرکے الیکشن چوری کا پلان ہے، الیکشن کمیشن نوٹس لے ۔انہوںنے کہاکہ قوم کو مہنگائی، بے روزگاری اور معاشی تباہی کی دلدل میں پھینکنے والے عوام کو کون سا ترقیاتی پیکج دے رہے ہیں ۔ انہوںنے کہاکہ قوم ان فراڈیوں، جعلسازوں اور وعدوں سے مکرنے والوں کی اصلیت جان چکے ہیں۔