کراچی میں 12 کلو گرام سونے کی نقب زنی واردات کا ڈراپ سین

اپنی ہی دکان میں چوری کا ڈرامہ رچانے والا ملزم آصف ساتھی سمیت گرفتار کر لیا گیا

جمعرات 6 مئی 2021 16:44

کراچی میں 12 کلو گرام سونے کی نقب زنی واردات کا ڈراپ سین

کراچی(اُردو پوائنٹ اخبارتازہ ترین - این این آئی۔ 06 مئی2021ء) کراچی کے علاقے کلفٹن میں گلف شاپنگ مال کے سنار کی دکان میں نقب زنی کی واردات کا ڈراپ سین ہوگیا، اپنی ہی دکان میں چوری کا ڈرامہ رچانے والا ملزم آصف ساتھی سمیت گرفتار کر لیا گیا ۔سائوتھ انویسٹی گیشن پولیس نے گلف شاپنگ مال میں سنار کی دکان میں نقب زنی کا معمہ حل کرلیا ۔ پولیس نے آئی آئی چندریگر روڈ پر واقع تجارتی مرکز پر چھاپہ مار کر 3 کلو سونا برآمد کرلیا ، پولیس کے مطابق کارروائی کے دوران نقب زنی کے مقدمہ الزام نمبر 201/2021 کے مدعی آصف اور اس کے ساتھی وسیم کو گرفتار کرلیا گیاہے۔

ملزم آصف میمن نے خود اپنی دکان سے سونا غائب کرکے نقب زنی کا ڈرامہ رچایا تھا ، گرفتار ملزم نے واقعے کا مقدمہ درج کراتے ہوئے اپنے بیان میں بتایا تھا کہ نامعلوم افراد نے دکان کے شٹر میں لگے تالے کاٹ کر دکان کے اندر سے 10 کلو گرام سونا چوری کیا تھا ، ڈی آئی جی سائوتھ جاوید اکبر ریاض نے مقدمے کی تفتیش کے لیے ایس پی انویسٹی گیشن سائوتھ کی سربراہی میں ایک اسپیشل ٹیم تشکیل دی تھی۔

(جاری ہے)

انویسٹی گیشن ٹیم نے مذکورہ دکان سی سی ٹی وی فوٹیج کی ڈی وی آر سمیت 15 دیگر دکانوں کی فوٹیج اور 20 سے 23 افراد کے بیانات قلمبند کیے ، بعدازاں 15 مشتبہ افراد سے تفتیش کی گئی جس کے دوران مدعی مقدمہ آصف میمن نے جرم کا اعتراف کرتے ہوئے آئی آئی چندریگر روڈ پر واقع ٹیکنو سٹی میں اپنے دوست وسیم کے آفس میں چھاپہ لگوا کر تین کلو سونا برآمد کرا دیا ، پولیس کا کہنا ہے کہ مزید مسروقہ سونا جلد برآمد کر لیا جائے گا ۔