کراچی،اینٹی نارکوٹکس فورس سندھ کی خفیہ اطلاع پرکارروائیاں ،مختلف نوعیت کی منشیات برآمد ،ملزمان گرفتار

جمعہ 7 مئی 2021 23:55

کراچی(اُردو پوائنٹ اخبارتازہ ترین - آن لائن۔ 07 مئی2021ء) اینٹی نارکوٹکس فورس سندھ کے عملے نے خفیہ اطلاع پر کی گئی کارروائیوں کے دوران مختلف نوعیت کی منشیات برآمد کر کے ملزمان کو گرفتار کر لیا ہے۔

(جاری ہے)

ترجمان کے مطابق اے این ایف کورنگی پولیس اسٹیشن کے عملے نے کوریئر کمپنی کے دفتر سے بیرون ملک کے لیے بک کرائے گئے پارسلز سے سوا کلو گرام اعلیٰ کوالٹی کی ہیروئین برآمد کی ہے جو بڑی مہارت سے ڈرائی فروٹس میں چھپائی گئی تھی،کوریئر کمپنی کے مطابق یہ کنسائنمنٹ ملزمان نے کینیڈا کے لیے ڈرائی فروٹس بھیجنے کی آڑ میں بک کرایا تھا،اسی ٹیم نے کوریئر سروس کے دفتر سے مزید 410 گرام اعلیٰ کوالٹی کی چرس برآمد کی ہے، ملزمان نے یہ منشیات ٹراؤزر بیلٹس میں خفیہ طریقے سے چھپائی تھی جو ڈنمارک اسمگل کی جا رہی تھی،ترجمان کے مطابق اے این ایف حیدرآباد پولیس اسٹیشن کے عملے نے سپر ہائی وے پر ایوب ہوٹل کے قریب ایک مشکوک کار کی تلاشی کے دوران اعلی کوالٹی کی 99 کلوگرام چرس برآمد کی ہے،اس کارروائی کے دوران ایک ملزم عبدالغنی کو بھی گرفتار کیا گیا ہے جو منشیات کی بین الصوبائی اسمگلنگ کے گروہ کا رکن ہے،اینٹی نارکوٹکس فورس کے مطابق ملزمان کے خلاف مقدمات درج کر لیے گئے ہیں