منظور پشتین اور رکن قومی اسمبلی محسن داوڑ کو اشتہاری قرار دینے کا حکم

اشتہاری قرار دینے کی کارروائی شروع کی جائے، اخبارات میں ملزمان کے اشتہارات اور خاکے شائع کیے جائیں: عدالت کا حکم

ہفتہ 5 جون 2021 23:22

منظور پشتین اور رکن قومی اسمبلی محسن داوڑ کو اشتہاری قرار دینے کا حکم
کراچی(اُردو پوائنٹ اخبارتازہ ترین۔ 05 جون2021ء) منظور پشتین اور رکن قومی اسمبلی محسن داوڑ کو اشتہاری قرار دینے کا حکم، کراچی کی انسداد دہشت گردی عدالت کے حکم کے مطابق پی ٹی اہم رہنماوں کو اشتہاری قرار دینے کی کارروائی شروع کی جائے، اخبارات میں ملزمان کے اشتہارات اور خاکے شائع کیے جائیں۔ تفصیلات کے مطابق اشتعال انگیز تقریر اور ملکی بغاوت کے مقدمے میں اہم پیش رفت ہوئی ہے، عدالت نے پی ٹی ایم رہنما منظور پشتین اور وزیرستان سے منتخب ایم این اے محسن داوڑ کو اشتہاری قرار دینے کی کارروائی کا حکم دے دیا ہے۔

عدالت نے حکم دیا کہ اخبارات میں ملزمان کے اشتہارات اور خاکے شائع کیے جائیں، عدالت نے ملزمان کی جایئداد کا ریکارڈ بھی طلب کر لیا، عدالت نے علی وزیر سمیت دیگر ملزمان کے آڈیو سیمپل لینے کی پولیس کی درخواست بھی منظور کر لی۔

(جاری ہے)

پولیس کے مطابق ملزمان کے آڈیو سیمپل اسلام آباد سے فرانزک کروائے جائیں گے، جس سے اشتعال انگیز تقریر کا پتا چل سکے گا کہ انھوں نے کی یا نہیں، دریں اثنا، عدالت نے طبی سہولیات فراہم کرنے سے متعلق علی وزیر کی درخواست بھی منظور کر لی، اور کیس کی سماعت 16 جون تک ملتوی کر دی۔

پولیس بیان کے مطابق ملزمان نے قومی اداروں کے خلاف نازیبا زبان استعمال کی تھی، علی وزیر کو پشاور اور دیگر 4 ملزمان کو کراچی سے گرفتار کیا گیا، جب کہ منظور پشتین و دیگر ملزمان مقدمے میں مفرور ہیں۔ یہاں واضح رہے کہ پی ٹی ایم سے تعلق رکھنے والے رکن قومی اسمبلی علی وزیر اور دیگر کے خلاف ملک مخالف تقریر کا مقدمہ کراچی کے سہراب گوٹھ تھانے میں درج کیا گیا تھا، جس کے بعد ان کی گرفتاری عمل میں آئی تھی۔ دوسری جانب پی ٹی ایم میں اندرونی اختلافات کی خبریں بھی سامنے آ رہی ہیں۔ میڈیا رپورٹس کے مطابق رکن قومی اسمبلی محسن داوڑ جلد پی ٹی ایم سے علیحدگی اختیار کر کے اپنی الگ سیاسی جماعت کا اعلان کر سکتے ہیں۔