سعودی حکومت نے موسم گرما میں کمپنیوں کو وارننگ جاری کر دی

ریاض(اُردو پوائنٹ تازہ ترین اخبار۔12 جون 2021ء) سعودی عرب کا شمار دُنیا کے گرم ترین خطوں میں ہوتا ہے۔ جبکہ گرمی کے دِنوں میں تو یہاں کی دھرتی آتش فشاں کی طرح سے کھولنے لگتی ہے۔ سعودیہ میں گزشتہ چند سالوں کے دوران ہر شعبے میں انقلابی اصلاحات متعارف کرائی جا رہی ہیں جس سے یہاں کے مقامی باشندے اور غیر ملکی ملازمین کی فلاح و بہبود میں خاصی ترقی دیکھنے کو مِلی ہے۔

گزشتہ سال کی طرح اس سال بھی سعودی وزارت افرادی قوت و سماجی بہبود نے اعلان کر دیا ہے کہ 15 جون20 20ء سے کسی بھی ملازم سے دوپہر بارہ بجے سے لے کر سہ پہر 3 بجے تک کھلے آسمان تلے مزدوری نہیں کروائی جائے گی کیونکہ ان مہینوں میں شدت کی گرمی پڑتی ہے جس سے ملازمین کی صحت اور زندگیوں کو خطرات لاحق ہو سکتے ہیں۔ سعودی وزارت کا کہنا ہے کہ منگل کے روز سے کھُلے مقامات پر ان تین گھنٹوں کے دوران کارکنان سے ڈیوٹی لینے کی اجازت نہیں ہو گی۔

(جاری ہے)

یہ پابندی 15 ستمبر 2021ء تک جاری رہے گی۔اس فیصلے کو اس فیصلے کو لاکھوں ایسے ملازمین نے بہت خوشی کی نظر سے دیکھا ہے جو تعمیراتی شعبے سے منسلک ہونے کے سبب تپتی سڑتی دوپہروں میں کھْلے آسمان تلے کام کرنے پر مجبور ہیں۔واضح رہے کہ یہ پابندی ہر سال عائد کی جاتی ہے۔متعلقہ آجروں کو ہدایت کی گئی ہے کہ 12 سے 3بجے کے پابندی والے اوقات کے مدنظر نئے اوقات کار مقرر کر دیں۔

اگر کوئی آجر اس حوالے سے معلومات حاصل کرنا چاہتا ہے تو وہ وزارت کے کیئر سروس 19911 پر رابطہ کر سکتا ہے۔ سعودیہ میں وزارت افرادی قوت و سماجی بہود کی جانب سے اس پابندی پرسختی سے عمل درآمد کرایا جاتا ہے۔ وزارت کی جانب سے مملکت کے مختلف شہروں میں تفتیشی ٹیمیں تشکیل دی جاتی ہیں۔ قانون کی خلاف ورزی کرنے والے اداروں اور آجروں پر جرمانے بھی عائدکیے جاتے ہیں۔