شوکت ترین کا کابینہ کی مخالفت کے بعد موبائل کالز، انٹرنیٹ ڈیٹا اور ایس ایم ایس پر ٹیکس لگانے کی تجویز واپس لینے کا اعلان

اسلام آباد (اُردو پوائنٹ اخبارتازہ ترین - این این آئی۔ 12 جون2021ء) وفاقی وزیر خزانہ شوکت ترین نے وزیر اعظم اور کابینہ کی مخالفت کے بعد موبائل کالز، انٹرنیٹ ڈیٹا اور ایس ایم ایس پر ٹیکس لگانے کی تجویز واپس لینے کا اعلان کرتے ہوئے کہا ہے کہ 40 لاکھ غریب ترین لوگوں کو بلاسود قرضے دئیے جائینگے ،کمرشل بینکوں سے سرمایہ کاری کروا رہے ہیں، ضمانت حکومت کی ہوگی، 70 سال سے چھوٹے کاشت کار کو کچھ نہیں ملا،غریب کسان کو پانچ لاکھ روپے تک قرض ملے گا ،حکومت کی چادر چھوٹی ہے ،سب کوآسانیاں نہیں دے سکتے، مہنگائی کی شرح 10 فیصد سے کم رکھنے کی کوشش کریں گے،صحت کارڈ ایک ہیلتھ انشورنس ہے ،اس کا دائرہ مزید بڑھائیں گے، آئی ایم ایف کیساتھ مذاکرات جاری ہیں ،چھٹا جائزہ جولائی تک چلے گا، ستمبر تک معاملات طے ہوجائیں گے، گھبرائیں نہ ،رواں سال ٹیکس وصولیاں 4700 ارب روپے تک پہنچ جائیں گی، پاکستان فوڈ ڈیفیسٹ ملک بن چکاہے، وزیر اعظم کی ہدایت پر زراعت پر حکومت مراعات دے رہی ہے اور مزید دینی پڑی تو دیں گے،آئندہ 3 سے 6 ماہ میں پینشز میں بڑی اصلاحات لارہے ہیں،2013 میں اسحاق ڈار نے گردشی قرضہ ختم کردیا تھا، گردشی قرضہ ختم ہونے کے بعد بڑھنا شروع ہوا، اگلے سال میں گردشی قرضے بڑھنے نہیں دیں گے،برآمدات بڑھا کر ہمیں ڈالر کمانے ہیں، آئندہ مالی سال 500 ارب روپے اضافی ٹیکس جمع کریں گے ، بجلی اور گیس کے بلوں کے ذریعے نان فائلر تک پہنچ جائیں گے،بڑے ریٹیلرز کی 1500 ارب کی سیل ہے، تمام بڑے اسٹورز پر سیلز ٹیکس لگیں گے، صارفین پکی پرچی لیں گے تو انعام دیں گے، ہم دالیں، گندم اور چینی بھی امپورٹ کررہے ہیں، اپنی فصلوں پر توجہ نہیں دی اب اس پر توجہ دیں گے،ہم منی بجٹ نہیں لائیں گے، انکم ٹیکس دینے والوں پر مزید بوجھ نہیں ڈالیں گے، ڈویلپنگ ملکوں میں ان ڈائریکٹر ٹیکس بڑھتے ہیں ،پرائیویٹ سیکٹر کے ساتھ مل کر کام کریں گے،جب تک سرمایہ کاری نہیں ہوگی تو معیشت کیسے بڑھے گی ، فی الوقت ہماری سیونگز کی شرح 15 سے 16 فیصد ہے ، ہمیں اسے بڑھانا ہوگا، سعودی عرب کے ساتھ موخر ادائیگیوں پر تیل کی خریداری کے حوالے سے بات چیت مکمل ہوگئی، توقع ہے عالمی منڈی میں تیل کی قیمتوں میں کمی ہونا شروع ہوجائے گی۔

(جاری ہے)

ہفتہ کو یہاں وفاقی وزیر خسرو بختیار ، مشیر تجارت عبد الرزا ق دائود ، معاون خصوصی ثانیہ نشتر و دیگر معاشی ٹیم کے ارکان کے ہمراہ پوسٹ بجٹ پریس کانفرنس کرتے ہوئے انہوںنے کہاکہ ہر کام اللہ کے فضل سے ہوتا ہے، اور اللہ ہی نے ہمیں وسیلہ بنایا اور ہم نے گروتھ بجٹ پیش کیا، معاشی بہتری کے اثرات عام آدمی تک پہنچیں گے۔انہوں نے کہا کہ اخوت پروگرام نے ڈیڑھ سو ارب روپے کے چھوٹے قرضے دئیے ہیں جس سے ریکوری 99 فیصد تک ہوئی۔

انہوںنے کہاکہ حکومت کے پاس اتنی گنجائش نہیں کہ ایک سال میں 500 سے 600 ارب روپے دے، عوام کو قرضے ہول سیل فنانسنگ، کمرشل بینکوں سے دلارہے ہیں۔انہوںنے کہاکہ کمرشل بینک جب غریب عوام کو قرضے دیں گے تو ہم انہیں ضمانت دیں گے کہ یہ پیسے واپس آئیں گے۔انہوں نے بتایا کہ ثانیہ نشتر ہر خاندان کی آمدن کے حوالے سے ایک سروے کر رہی ہیں، اس کے مطابق یہ قرضے دیے جائیں گے، غریب کے ساتھ سیاست نہیں کرنی چاہے وہ ملک کے کسی بھی کونے میں ہو۔

انہوں نے کہا کہ کاشتکار کو ڈیڑھ لاکھ روپے ہر فصل کا دیں گے، ٹریکٹر لیز کرنے کے 2 لاکھ روپے دیں گے اور شہری علاقوں میں 5 لاکھ روپے تک کا بلا سود قرضہ دیں گے تاکہ وہ کاروبار کرسکے۔شوکت ترین نے کہا کہ ہم ہر خاندان کو اپنی چھت دیں گے، اس کی حد 20 لاکھ روپے تک ہے کیونکہ شہری علاقوں میں زمینیں مہنگی ہیں۔انہوں نے کہا کہ اس کے علاوہ جب غریب کے گھر کوئی بیمار ہوجاتا ہے تو انہیں علاج کے لیے پیسوں کے مسائل کا سامنا ہوتا ہے اور انہیں اپنی چیزیں بیچنی پڑ جاتی ہیں تاہم صحت کارڈ سے ان کے مسائل کا حل ہوگا۔

انہوںنے کہاکہ ہم چاہتے ہیں کہ اِسکل ڈیولپمنٹ پر کام کریں تاکہ غریبوں کو روزگار مل سکے۔انہوں نے کہا کہ حکومت نے معاشی نمو کو سب تک منتقل کیا ہے اور اس بجٹ میں پی ایس ڈی پی، صنعتوں زراعت وغیرہ سب کو مراعات دی ہیں تاہم اب ہمارا چیلنج مستحکم نمو لانا ہے۔وزیر خزانہ نے کہا کہ ملک کے قابل اکانومسٹ کو اکٹھا کرکے میں ان سے یہ سوال کیا تھا کہ ہمارے ملک کی مستحکم نمو کیوں نہیں ہوتی تو انہوں نے کہا تھا کہ جب آپ کی معیشت میں طلب بڑھتی ہے تو درآمد بڑھتی ہے اور برآمد اتنی نہیں بڑھتی جس سے ڈالر کم ہوتے ہیں اور وہ آپ چھاپ نہیں سکتے تو آپ کی مالیاتی صورتحال کمزور ہوجاتی ہے اور آپ کو آئی ایم ایف کے پاس جانا پڑتا ہے۔

وزیر خزانہ نے کہاکہ اسی وجہ سے ہم ہر وقت آئی ایم ایف کے پاس جاتے ہیں، ہمیں ڈالر کمانے ہیں جو ہم برآمدات سے ہی کماسکتے ہیں۔انہوں نے کہا کہ ہماری برآمدات جی ڈی پی کا 8 فیصد ہے، کوشش ہے کہ آئندہ 8 سے 10 سال کے درمیان اسے 20 فیصد تک لے جائیں۔شوکت ترین نے کہاکہ اس کے علاوہ ماہرین نے کہا تھا کہ ہمیں اپنی سیونگز بڑھانی ہوں گی اس کے ذریعے سرمایہ کاری ہوگی۔

انہوںنے کہاکہ جب تک سرمایہ کاری نہیں ہوگی تو معیشت کیسے بڑھے گی، فی الوقت ہماری سیونگز کی شرح 15 سے 16 فیصد ہے اور ہمیں اسے بڑھانا ہوگا۔انہوں نے کہا کہ ہمارے پاس ریونیو نہیں، ریونیو ایف بی آر اور صوبے اکٹھا کرتے ہیں، ہم نے اس پر کافی چیلنجنگ ٹاسک دیا ہے کہ وہ 47 کھرب تک اکٹھا کریں گے۔وزیر خزانہ نے کہا کہ کہا جارہا ہے کہ یہ کیسے ہوگا، ہم یہ پورا کرلیں گے، جیسا خان صاحب کہتے ہیں، گھبرانے کی ضرورت نہیں ہے۔

انہوںنے کہاکہ ہم نے اسے آئندہ سال کے لیے 58 کھرب کردیا ہے، تو لوگ کہہ رہے ہیں کہ یہ رسک ہے، ہم نے بہت لوگوں کی معلومات حاصل کرلی ہیں جو ٹیکس نہیں دیتے، ہم اب ان کے پاس جائیں گے۔انہوں نے کہا کہ آئی ایم ایف سے یہی مذاکرات ہوئے ہیں کہ جو ٹیکس دے رہے ہیں ان پر ٹیکس نہیں لگائیں گے بلکہ مزید لوگوں کو ٹیکس نیٹ میں لائیں گے۔شوکت ترین نے کہا کہ 10 ہزار پی او ایس استعمال کیے ہیں جس سے 150 سے 125 ارب کی فروخت ریکارڈ کی ہے، یہ کچھ بھی نہیں، صرف امتیاز اسٹور کی فروخت 2 سے 3 سو ارب کی ہے مطلب انہوں نے پورے ظاہر ہی نہیں کیے میں اور کا نام نہیں لینا چاہتا۔

انہوںنے کہاکہ ہم چاہتے ہیں کہ مزید اداروں کو اِس پی او ایس نظام میں لے کر آئیں۔انہوں نے کہا کہ پی او ایس پر آنے کے بعد ریٹیلر کچی پرچی پر کام کرنا شروع کردیں گے تو اسے روکنے کیلئے صارفین سے پکی پرچی طلب کریں گے اور اس پر 25 کروڑ روپے تک کے انعامات دیں گے جسے بڑھا کر ایک ارب روپے تک لے کر جائیں گے۔شوکت ترین نے کہا کہ صارف خود جاکر ان کا گلا پکڑیگا کہ ہمیں پکی پرچی چاہیے ہیں، یہ ترکی اور دیگر ممالک میں بھی طریقہ کار اپنایا جاچکا ہے۔

انہوںنے کہاکہ 4 علاقوں کو ٹریک اینڈ ٹریس میں لے کر آئیں گے، ہم کرسکتے ہیں گزشتہ سال بغیر پی او ایس کے 160 ارب اکٹھا کیا تھا ہم نے۔شوکت ترین نے کہاکہ ہمارا ریونیو ہدف جارحانہ ضرور ہے تاہم اگر ہم نے یہ کرلیا تو ایک مالی خلا ہمیں ملے گی جس کو ہم زراعت میں استعمال کرسکیں گے۔انہوںنے کہاکہ ہمارا ملک خوراک کی کمی کا شکار ہے اور اس کا مطلب ہے کہ ہم اہم چیزیں درآمد کر رہے ہیں، ہم نے فصلوں پر توجہ نہیں دی اور اب ہم اس پر توجہ دیں گے۔

انہوںنے کہاکہ وزیر اعظم کے منصوبے کے مطابق جو مراعات دینی تھیں دی ہیں اور آگے ضرورت پڑی تو اور بھی دیں گے۔انہوں نے کہا کہ ہم برآمدات میں جو مراعات دے سکتے تھے دی ہیں، ہم صرف ٹیکسٹائل تک محدود نہیں رہے بلکہ خصوصی اقتصادی زونز سے ٹیکسز ختم کردیے ہیں تاکہ چین سے سرمایہ کار یہاں آئے اور چیزیں بنا کر برآمد کریں اور ڈالر کمائیں۔شوکت ترین نے کہا کہ ہم نے بجلی اور انفراسٹرکچر سمیت اقتصادی زونز پر خرچے کردئیے ہیں اور ہمیں یہ پیسے واپس کرنے ہیں اگر ڈالر نہیں کمائیں گے تو پیسے کیسے واپس کریں گے۔

انہوںنے کہاکہ ہم آئی ٹی میں نمو کو بڑھانا چاہتے ہیں جو اس وقت 40 سے 45 فیصد پر ہے اور اسے 100 فیصد تک لے جانا چاہتے ہیں۔انہوں نے کہا کہ برآمدات کے شعبے میں تقریباً تمام خام مال پر ٹیکس صفر کردئیے ہیں کیونکہ زراعت کے بعد سب سے زیادہ روزگار صنعتیں دیتی ہیں۔وزیر خزانہ نے کہاکہ اس کے علاوہ ہاؤسنگ کا شعبہ بھی ترقی کر رہا ہے اور بینکس مطمئن ہیں کہ وہ پیسے جو دیں گے وہ ریکور ہوجائیں گے۔

انہوںنے کہاکہ ہماری مارک ایپ کی شرح 12 سے 14 فیصد تھی جو لوگوں کے لیے مناسب نہیں تھی کیونکہ کرائے کو اور قسطوں کا موازنہ کیا جاتا تھا تو کرایہ 10 ہزار ہو تو قسط 20 ہزار ہوتی تھی۔انہوں نے کہا کہ عمران خان نے اس پر چھوٹ دے کر لوگوں کی پہنچ تک اسے لے کر آئے ہیں اور امید ہے کہ یہ شرح مزید نیچے جائے گی اور مڈل کلاس کو بھی گھر مل سکیں گے۔شوکت ترین نے کہاکہ سب سے زیادہ ہم نے پاور سیکٹر پر سبسڈیز میں اضافہ کیا ہے اور تمام ڈسکوز کو ٹھیک کرکے ان کی نجکاری کردیں گے تاکہ ہماری نمو صلاحیتی ادائیگی کا استعمال شروع کردیں گی۔

انہوںنے کہاکہ ہمیں 5 سے 7 سال کا وقفہ چاہیے جس میں ہم ان صلاحیتی ادائیگی کو موخر کرسکیں۔انہوں نے کہا کہ پاور سیکٹر کو مالیاتی طور پر مستحکم بنانا ہے، اگر ایسا نہ کریں گے تو ہمیں ٹرانسمیشن میں پیسے جو درکار ہیں اس میں پرائیوٹ سیکٹر پیسے نہیں ڈالے گا۔انہوں نے کہا کہ ایک چیز واضح کردوں کہ گزشتہ روز بجٹ میں رکھا تھا کہ موبائل کالز، انٹرنیٹ اور ایس ایم ایس پر ٹیکس لگانے کا کہا تھا، کابینہ نے اس کی مخالفت کی اور یہ اب ہم یہ نہیں کر رہے ہیں۔

سرکاری ملازمین کی تنخواہوں کے حوالے سے سوال کے جواب میں وزیر خزانہ نے کہا کہ ہمیں سرکاری ملازمتوں کو بہتری کرنے کی ضرورت ہے جو ملازمین زیادہ کام کرتے ہیں اور جو کم کرتے ہیں ان میں فرق ہونا چاہیے، بہت بڑی تبدیلی کی ضرورت ہے لیکن یہ حکومت ان مشکلات سے نہیں گھبراتی۔انہوں نے کہا کہ ہمیں حکومتی نظام کو 60 کے دہائی جیسا بنانا ہے، ایک سے 2 سال میں یہ نہیں ہوگا، اس نظام میں بہت سیاسی مداخلت ہوگئی ہے جسے ٹھیک کرنے کے لیے 5 سے 7 سال لگیں گے اور اس کے بعد تنخواہوں کے مسئلے حل ہوجائیں گے۔

آئندہ مالی میں مہنگائی کی شرح 10 فیصد رہنے اور پاور سیکٹر کو ٹیرف سبسڈی سے متعلق سوال کے جواب میں انہوںنے کہاکہ ہم چاہیں گے کہ ہم اگر انہیں پیسے دے رہے ہیں تو پاور سیکٹر اپنی کارکردگی بھی بہتر بنائیں اور نقصانات کم کرے، ریکوری بہتر بنائیں اور اگر بیرونی منڈیوں میں کوئی بھونچال نہ آئے تو مہنگائی کی شرح 10 فیصد کم رہے گی۔اشیائے خورونوش کی مہنگائی کے حوالے سے پوچھے گئے سوال کے جواب میں وزیر خزانہ نے کہا کہ جب تک زرعی پیداوار نہیں بڑھے گی خوراک کے معاملے خود کفیل نہیں ہوں گے اس وقت تک بین الاقوامی قیمتوں کے اتار چڑھاؤ سے متاثر رہیں گے۔

انہوں نے کہا کہ ہم کاشت کاروں کو پیداور بڑھانے کیلئے مراعات دے رہے ہیں اور آڑھتیوں کی منافع خوری کو روکنا ہوگا جس سے کاشتکار کا استحصال ہورہا ہے جس کے لیے ہمیں کولڈ اسٹوریج قائم کرنے کے ساتھ ایسا نظام قائم کرنا ہوگا جس میں کاشتکار کا استحصال نہ ہو اور وہ مڈل مین کے بجائے براہِ راست ہول سیل مارکیٹوں میں زرعی اجناس فروخت کرے۔وزیر خزانہ نے کہا کہ اس کے علاوہ گڈ گورننس کی کوششیں کی جارہی ہیں اور ہر ضلع میں عہدیدار ان چیزوں کی نگرانی کر کے خامیوں کی نشاندہی کریں گے، اور مختصر مدت کے لیے 4 سے 5 اہم اور روزمرہ استعمال کی اجناس کے ذخائر بنائیں گے اور جن منڈیوں کی قیمتیں زیادہ ہوئی وہاں بھیج دی جائیں گی۔

بلواسطہ ٹیکس کے بارے میں شوکت ترین نے کہا کہ ترقی پذیر ممالک ٹیکس بیس بڑھانے کے لیے شروع میں بالواسطہ ٹیکسز کا ہی سہارا لیتے ہیں اور جب آمدن مستحکم ہوجاتی ہے تو براہِ راسٹ ٹیکس بڑھنا شروع ہوتے ہیں۔ایک سوال کے جواب میں وزیر خزانہ نے کہا کہ ہم آئی ایم ایف پروگرام سے نکلے نہیں ہیں ان کے ساتھ ہماری بات چیت جاری ہے اور جولائی کا جائزہ نہیں ہوا تو ہم ستمبر تک اہداف پوراکرنے کی کوشش کریں گے۔

وزیر خزانہ نے کہا کہ آئی ایم ایف اور ہماری منزل ایک ہے وہ چاہتے ہیں کہ ہم پائیدار ترقی کی جانب جائیں اور پھر آہستہ آہستہ نمو کریں جبکہ ہمارا مؤقف یہ ہے کہ ٹیرف اور انکم ٹیکس میں اضافہ کرنا مناسب طریقہ نہیں ہے اور ہم ٹیرف کے بجائے گنجائش کا استعمال بڑھائیں، ریکوری زیادہ کریں، لائن لاسزز کم کریں جس میں تھوڑا وقت لگے گا جس سے ہمارا اور آپ کا مقصد پورا ہوگا۔

انہوں نے کہا کہ لوگوں کی آمدن پر لگنے والے ٹیکسز میں مزید اضافہ نہیں کیا جائے گا ان پر بوجھ نہیں ڈالا جائے گا، ہم ڈیجیٹائزیشن کر کے ٹیکس بیس کو وسیع کریں گے، یہ آئندہ جون تک کا منصوبہ ہے۔وزیر خزانہ نے کہا کہ ہمارے پاس اس وقت بین الاقوامی مارکیٹ میں اور بھی راستے ہیں جہاں سے پیسے اکٹھے کرسکتے ہیں۔ انہوںنے کہاکہ 6 کھرب روپے اکٹھا کرنے کیلئے پیٹرولیم لیوی نہیں بڑھائیں گے ہم انتظار کریں گے، ایران سے پابندی ہٹنے کی صورت میں وہ تیل کی پیداوار بڑھا دیں گے جس کی وجہ سے قیمتوں میں کمی آئے گی اور اس کے اثرات ہم اپنے پاس بھی رکھیں گے ساتھ ہی سعودی عرب کے ساتھ تاخیر کی ادائیگیوں کے حوالے سے بات چیت ہوگئی ہے لہٰذا پیٹرولیم کی قیمت میں اضافہ نہیں ہوگا۔

ٹیکس ریونیو کے ہدف کے بارے میں شوکت ترین نے کہا کہ پہلے ٹیکس بیس 3800 ارب تھی اور معیشت سکڑ رہی تھی شرح نمو 2.1 فیصد تھی تو شبر زیدی اس لیے 55 سو ارب روپے ریونیو کا ہدف پانے میں ناکام رہے تاہم آج 4700 ٹیکس بیس ہے اور شرح نمو 5 فیصد ہے۔وزیر خزانہ نے کہا کہ ٹیکس ریونیو ٹارگٹ میں زیادہ رسک نہیں ہے اور کہیں کمزوری آئی بھی تو ہم منی بجٹ نہیں لائیں گے۔

غریبوں کیلئے احساس پروگرام کے باوجود خطِ غربت کے نیچے بسنے والے افراد کی تعداد میں اضافے سے متعلق سوال کے جواب میں انہوں نے کہا کہ احساس پروگرام ڈیڑھ کروڑ خاندانوں کا احاطہ کرے گا لیکن ٹرکل ڈاؤن گروتھ میں ایک سے دو سال کے عرصے میں جب نوکریاں بڑھیں گی تو مڈل اور لوئر مڈل کلاس کی صورتحال بہتر ہونا شروع ہوجائے گی۔وزیرخزانہ نے کہا کہ یوٹیلیٹی اسٹورز کی تعداد بڑھا کر 10 ہزار کرنا چاہتے ہیں اور اسے کمپیوٹرائزڈ کرنا چاہتے ہیں جس کے تحت ہر خاندان کو ایک کوٹا دے دیا جائے گا تا کہ لوئر مڈل اور مڈل کلاس کو تحفظ دیا جائے۔

غیر قانونی سگریٹ انڈسٹری کے بارے میں سوال کے جواب میں وزیر خزانہ نے کہا کہ اگر ٹیکس بڑھانے کی ضرورت پڑی تو بڑھائیں گے لیکن پہلے ٹریک اینڈ ٹریس کے ذریعے غیر قانونی طور پر سگریٹ بنانے والوں کو پکڑا جائے گا لیکن ہم ایسا اقدام نہیں اٹھانا چاہتے جسے دوسری جانب سے سپورٹ نہ کرسکیں۔ایک سوال کے جواب میں وزیر خزانہ نے کہا کہ نچلے طبقے کو کاروبار کے لیے پیسے دے رہے ہیں جبکہ نوجوانوں کی اسکلز ڈیویلپمنٹ کیلئے پروگرام لارہے ہیں، جس سے گھرانے خوشحال ہونا شروع ہوں گے۔

پنشن کے بارے میں وزیر خزانہ نے کہا کہ یہ بہت بڑا مسئلہ ہے جس کی وجہ سے امریکا میں بھی بڑے بڑے ادارے ناکام ہوگئے اس لیے ہم اصلاحات کریں گے اور آئندہ 3 سے 6 ماہ میں آپ کو بڑی تبدیلی نظر آئے گی کیوں کہ یہ ہماری، صوبوں اور فوج کے لیے برداشت سے باہر ہوگئی ہے۔آئی پی پیز کے حوالے سے سوال کے جواب میں وزیر خزانہ نے بجلی بنانے کی صلاحیت بہت زیادہ بڑھ گئی ہے جس کی ادائیگیاں 2023 میں 18 کھرب روپے سالانہ تک پہنچ جائے گی اور یہ وہ بجلی ہے جو ہم استعمال نہیں کرتے۔

انہوں نے کہا کہ پاور پلانٹس بن گئے ہیں جنہیں ختم نہیں کیا جاسکتا آئی ایم ایف کہتا ہے ٹیرف لگادو لیکن اگر ایسا کیا تو سب بند ہوجائے گاچونکہ صلاحیت بڑھی ہے اس لیے اسے استعمال کر کے کم کرنا ہے جس کے لیے ہماری شرح نمو اتنی ہونی چاہیے تو اس بجلی کو استعمال کرسکے تا کہ ہم گنجائش کی ادائیگیاں نہ کریں بلکہ وہ بجلی فروخت کر کے اپنے قرضے اتاریں اور پاور سیکٹر کو فعال بنائیں۔

اس موقع پر وفاقی وزیر صنعت و پیداوار خسرو بختیار نے بتایاکہ ٹریکٹرز کی پیداور بڑھے گی تو چھوٹی صنعتیں جو پارٹس بناتی ہیں ان کی پروڈکشن بھی بڑھے گی، 9 فیصد کی نمو رواں سال رہی ہے تاہم ہم نے چیلنج خود کو 6 فیصد کا دیا ہے۔انہوںنے کہاکہ پرائیوٹ سیکٹر انویسٹمنٹ اور سیونگز کی شرح میں آہستہ آہستہ تبدیلیاں آئیں گی۔انہوں نے کہا کہ 'برآمدات کو تقویت دینے کیلئے انقلابی اقدامات کیے گئے ہیں، صنعتوں کا پہیہ چلنے کے لیے بجلی اور گیس کی ضرورت ہے۔

انہوںنے کہاکہ معیشت کا پہیہ تب ہی چلے گا جب صنعتون کا پہیہ چلے گا۔خسرو بختیار نے کہاکہ آٹو سیکٹر آدھی صلاحیت پر چل رہا ہے، 800 سی سی سے کم کی گاڑیوں کی قیمت کم کر رہے ہیں اور باقی سی سیز پر بھی بات چیت چل رہی ہے اور آٹو پالیسی بڑی جامع ہوگی۔انہوں نے کہا کہ ہمارا فلسفہ میک اِن پاکستان کا ہے، گلوبل ایکسپورٹ ویلیو چین میں پاکستان کے آٹو سیکٹر کو ڈالنا ہے۔

انہوں نے بتایا کہ ہمارے معاشی حب کراچی میں زمین بہت مہنگی ہے، کراچی میں 1500 ایکڑ کا خصوصی زون پی ایس ڈی پی میں رکھا گیا ہے۔وفاقی وزیر نے کہا کہ برآمدات پر مبنی صنعتیں یہاں آئیں اور انہیں زمین لیز پپر دی جائے گی۔انہوںنے کہاکہ صنعتی نمو میں ہم انجینئرنگ پر بھی توجہ دے رہے ہیں، ہم بھلے پوری گاڑی برآمد نہ کرسکیں مگر ہم چاہتے ہیں کہ کم از کم اس کے کچھ پارٹس تو برآمد کریں۔

انہوں نے کہا کہ ملک کے اندر مستحکم نمو رکھنا ہے تو برآمدات کو بڑھانا ہوگا۔وفاقی وزیر تجارت عبدالرزاق داؤد نے کہا کہ ہماری مرکزی حکمت عملی دو حصوں میں ہے ایک برآمدات اور ایک میک اِن پاکستان۔انہوںنے کہاکہ ہمیں ابھی بھی ڈالرز چاہیے ہیں، ہمیں ٹیکسٹائل پر انحصار نہیں کرنا، اس صنعت نے بہت اچھا پرفارم کیا اور اسے اگلے سال ہم نے 20 ارب تک پہنچنے کا ہدف دیا ہے۔

انہوں نے کہا کہ ہماری توجہ انجینئرنک، فارما، آئی ٹی، موبائل فونز، جوتے، فوڈ پروسیسنگ وغیرہ ہیں، رواں سال ان میں سے فارماسیوٹیکل کے نتائج اچھے آئے ہیں اور آئندہ سال اس پر زیادہ توجہ دیں گے۔وزیر تجارت نے کہاکہ برآمدات سے پہلے ہمیں چیزیں پاکستان میں بنانی ہوں گی، پچھلے سال ہم نے خام مال پر ڈیوٹیز کم کی تھیں اور اس سال سب سے زیادہ ڈیوٹیز میں کمی کی ہے۔

انہوں نے کہا کہ 'ایک ایک آئٹم پر ڈیوٹی کم کی ہے، کافی سالوں سے پاکستان میں کام کر رہا ہوں کبھی اتنی کمی نہیں دیکھی۔انہوںنے کہاکہ اس کا پھل رواں سال اور آئندہ سال سامنے آئے گا، پاکستان میں چیزیں بنیں گی اور کاروبار کی لاگت کم ہوجائیں گی اور ہماری برآمدات بڑھیں گی۔انہوں نے کہا کہ پر امید ہوں کہ آئندہ سال ہماری تجارت اور سرمایہ کاری بہتر ہوگی۔

وزیر تخفیف غربت ثانیہ نشتر نے کہا کہ احساس پروگرام کے لیے اس بجٹ میں 260 ارب روپے مختص ہیں، یہ وزیر اعظم کا ترجیحی پروگرام ہے۔انہوںنے کہاکہ 10 بڑے پروگرام جو اس فنڈ سے چلیں گے ان پروگرامز میں سب سے پہلے احساس ایمرجنسی کیش کے دوسرے مرحلے کا آغاز ہے جس کے تحت ایک کروڑ 20 لاکھ خاندانوں کو 12 ہزار روپے پہنچائے جائیں گے۔انہوں نے کہا کہ احساس کفالت میں جنوری سے 6 ماہی قسط 12 ہزار کی بجائے 13 ہزار کی ہوگی، اس میں ایک کروڑ لوگوں کو شامل کرنے جارہے ہیں، یہ پاکستان کی تاریخ کا سب سے بڑا سماجی تحفظ کا پروگرام بن رہا ہے، اس میں اپیل کا اختیار بھی شامل کر رہے ہیں تاکہ لوگ جیسے جیسے ضرورت ہو ہم تک اپنی بات پہنچا سکیں اور ہم ان پر رد عمل دے سکیں۔

وفاقی وزیر نے کہا کہ اس کے علاوہ اس پروگرام کی ادائیگی کیلئے دو بینکوں سے شراکت داری ہونے کی وجہ سے ادائیگی کے وقت لوگوں کی قطار لگ جاتی تھی اور اب ہم عوام کو کسی بھی بینک میں اپنے اکاؤنٹ کھولنے کا اختیار دے رہے ہیں۔انہوںنے کہاکہ احساس برائے خصوصی افراد میں 20 لاکھ خاندان شامل ہوں گے، رواں سال ہم احساس نشونما پروگرام کو 50 ضلع تک لے کر جائیں گے اور 150 احساس نشونما سینٹر کھولیں گے۔

انہوں نے کہا کہ احساس کے تعلیمی وضائف کی پالیسی کو پاکستان کے سارے اضلاع تک لے گئے ہیں، نظام ڈیجیٹل کردیا ہے اور اب صرف پرائمری نہیں سیکنڈری کے بچوں کو بھی یہ وضائف دیے جائیں گے ،وظیفوں کو بھی بڑھا دیا گیا ہے اور لڑکوں سے زیادہ لڑکیوں کا وظیفہ کردیا گیا ہے۔ثانیہ نشتر نے کہا کہ رواں سال 65 ہزار میرٹ پر اسکالر شپس دی ہیں اور آئندہ سال بھی اتنی ہی دی جائیں گی۔

انہوںنے کہاکہ ہم احساس تحفظ کے نام سے نیا پروگرام لے کر آئیں گے، یہ ان لوگوں کے لیے ہے جن کے پاس صحت کارڈ نہیں اور جو سرکاری ہسپتالوں میں جاتے ہیں۔انہوں نے کہا کہ وزیر اعظم کی ہدایت کے مطابق پناہ گاہوں کا سلسلہ پھیلایا جائے گا اور اس کا معیار بہتر رکھا جائے گا، کوئی بھوکا نہ سوئے پروگرام میں بھی وسعت آئے گی۔انہوںنے کہاکہ احساس پروگرام کے دائرے کے نیچے ملک کے 110 اضلاع میں بلا سود قرضے کا پروگرام بھی چل رہا ہے۔

انہوں نے بتایا کہ احساس اشیا کے پروگرام پر بھی غور کیا جارہا ہے اور آئندہ ماہ یوٹیلیٹی اسٹورز پر اس پر عمل در آمد شروع ہوجائے اور اس کے ذریعے کمزور طبقے کو دکان سے سستی اور متواسط طبقے کو عام قیمتوں میں اشیا فراہم کی جائیں گی۔انہوں نے کہا کہ احساس ڈیجیٹل ہنر کا بھی پروگرام حکومت لارہی ہے جس کے لیے بھی فنڈ بجٹ میں مختص ہے۔ثانیہ نشتر نے کہاکہ سروے 92 فیصد مکمل کرلیا گیا اور اس سے پاکستان کے ہر گھر کی معاشی صورتحال سامنے آئے گی، جون کے آخر تک یہ مکملم کرلیا جائیگا۔انہوں نے کہا کہ گزشتہ ہفتے احساس ون ونڈو سینٹر کا اجرا ہوا تھا اور ہمارا وعدہ ہے کہ یہ ہم پاکستان کے ہر ضلع میں کھولیں گے۔انہوںنے کہاکہ گورننس سے متعلق اصلاحات پر بھی تفصیلی کام کیا جائیگا۔