پی ایس ایل 6، اسلام آباد یونائیٹڈ پلے آف مرحلے میں پہنچنے والی پہلی ٹیم بن گئی

اسلام آباد 12 پوائنٹس کیساتھ پہلی پوزیشن پر ہے، پشاور زلمی،لاہور قلندرز بالترتیب دوسری اور تیسری پوزیشن پرموجود، ملتان سلطانز کی ٹیم چوتھے، دفاعی چیمپئن کراچی کنگز 5ویں پوزیشن پر براجمان، کوئٹہ گلیڈی ایٹرزکا آخری نمبر

ذیشان مہتاب بدھ 16 جون 2021 14:55

پی ایس ایل 6، اسلام آباد یونائیٹڈ پلے آف مرحلے میں پہنچنے والی پہلی ..

ابوظہبی (اردو پوائنٹ تازہ ترین اخبار ۔ 16 جون 2021ء ) اسلام آباد یونائیٹڈ پی ایس ایل 6 کے پلے آف کے لیے کوالیفائی کرنے والی پہلی ٹیم بن گئی ہے۔ پاکستان سپر لیگ سکس کے دلچسپ مقابلے ابوظبی میں جاری ہیں جہاں اسلام آباد یونائیٹڈ نے پلے آف کے لیے کوالیفائی کرلیا ہے۔ 2016ء اور 2018ء کی پی ایس ایل چیمپئن اسلام آباد یونائیٹڈ 8 میچز میں 12 پوائنٹس حاصل کرکے پہلی پوزیشن پر ہے، پشاور زلمی 10 پوائنٹس کے ساتھ دوسرے اور لاہور قلندرز اتنے ہی پوائنٹس لے کر تیسرے نمبر پر ہے، یہ دونوں ٹیمیں بھی 8، 8 میچز کھیل چکی ہے۔

ملتان سلطانز کی ٹیم 6 پوائنٹس کے ساتھ چوتھے نمبر پر ہے، دفاعی چیمپئن کراچی کنگز کی 6 پوائنٹس کے ساتھ پوائنٹس ٹیبل پر پانچویں پوزیشن ہے جبکہ کوئٹہ گلیڈی ایٹرز 4 پوائنٹس کے ساتھ ٹیبل پر آخری نمبر پر ہے۔

(جاری ہے)

دوسری جانب پی ایس ایل کا اہم میچ آج کوئٹہ گلیڈی ایٹرز اور ملتان سلطانز کے درمیان کھیلا جائے گا، پلے آف کی امیدوں کو زندہ رکھنے کیلئے سرفراز الیون کو آج کا میچ جیتنا لازمی ہے، شکست کی صورت میں پی ایس ایل کے بقیہ میچز کوئٹہ کی ٹیم کے لیے بے معنی ہوجائیں گے۔ ملتان سلطانز کیلئے آج کا میچ نہایت اہمیت کا حامل ہے، اگر سلطانز کو آج کے مقابلے میں شکست کا سامنا کرنا پڑا تو پلے آف تک رسائی کیلئے انہیں آخری دونوں میچ بڑے مارجن سےجیتنا ہوں گے۔