جی سی یو میں کشمیریوں اور فلسطینیوں سے اظہارِ یکجہتی کے لیے سیمینار کا انعقاد

لاہور۔ (اُردو پوائنٹ اخبارتازہ ترین - اے پی پی۔ 16 جون2021ء) گورنمنٹ کالج یونیورسٹی میں کشمیر سوسائٹی کے زیر اہتمام کشمیریوں اور فلسطینیوں سے اظہار یکجہتی کے لیے سیمینار کا انعقاد کیا گیا۔وزیربرائے ہائوسنگ واربن ڈویلپمنٹ میاں محمود الرشید نے خصوصی شرکت کی جبکہ اس موقع پر وائس چانسلر پروفیسرڈاکٹر اصغر زیدی نے فلسطین سوسائٹی کے قیام کا اعلان کیا۔

تقریب سے خطاب کرتے ہوئے میاں محمود الرشید کا کہنا تھا کہ نئی نسل مسئلہ کشمیر اور فلسطین کے حوالے سے زیادہ آگاہ،فکرمند اور متحرک ہے، آزادی کے حصول کے لیے حزب اللہ، حماس اور فلسطینیوں کا جوش و جذبہ قابل دید ہے،آج پوری دنیا میں اسرائیلی بربریت کے خلاف احتجاج جاری ہے جس سے اسرائیل کو گھٹنے ٹیکنے پڑے۔میاں محمود الرشید نے کہا کہ وزیراعظم پاکستان عمران خان نے دو ٹوک الفاظ میں اسرائیل کو تسلیم کرنے سے انکار کیا، وزیر اعظم نے بین الاقوامی سطح پر اسرائیل جارحیت کی بھی بھرپورمذمت کی۔

(جاری ہے)

انہوں نے کہاکہ اسرائیل پچھلے بہتر سال سے قبلہ اول پر مسلط ہے اورپچھلے کچھ عرصے سے فلسطین میں ظلم کی انتہا کر دی ہے،اتنا ظلم تاریخ میں کبھی نہیں دیکھاگیا،مسئلہ فلسطین کا حل1966کی حدبندی اور اقوام متحدہ کی قراردادوں کے تحت ہونا چاہیے۔ سیمینار سے خطاب کرتے ہوئے وائس چانسلر پروفیسر ڈاکٹر اصغر زیدی کا کہنا تھا کہ یونیورسٹی میں کشمیر سوسائٹی بنانے سے یوتھ موومنٹ بنی،اب یونیورسٹی میں فلسطین سوسائٹی بھی قائم کرنے جا رہے ہیں،تاکہ ہمارے طلبا فلسطین میں انسانی حقوق کی خلاف ورزیوں کو عالمی سطح پر بے نقاب کرسکیں۔

انہوں نے مزید بتایا کہ گورنر پنجاب چوہدری محمد سرور فلسطین سوسائٹی کے چیئرمین ہونگے،جی سی یو 10 فلسطینی طلبا کو او ای سی کے سکالرشپ کے تحت داخلہ دے گی۔ہم اسلامی ممالک میں نامور یورسٹیز کا اتحاد بھی بنا رہے تا کہ متحد ہو کر فلسطین میں انسانی حقوق کی پامالی کے خلاف آواز اٹھائیں۔او آئی سی کے کوارڈینیٹر جنرل پروفیسر ڈاکٹرمحمد اقبال چوہدری نے بھی ویڈیو لنک کے ذریعے خطاب کیا،جبکہ سینئر صحافی سلمان غنی نے مسئلہ فلسطین کے تاریخی پہلو اور جغرافیائی اہمیت پر روشنی ڈالی۔