وزیراعلیٰ عثمان بزدار سے گجرات سے تعلق رکھنے والے اراکین پنجاب اسمبلی کی ملاقات، عوام دوست بجٹ پیش کرنے پر مبارکباد

لاہور (اُردو پوائنٹ اخبارتازہ ترین - آن لائن۔ 21 جون2021ء) وزیراعلیٰ پنجاب سردار عثمان بزدار سے وزیراعلیٰ آفس میں گجرات سے تعلق رکھنے والے اراکین پنجاب اسمبلی نے ملاقات کی-اراکین پنجاب اسمبلی نے وزیراعلیٰ عثمان بزدار کو عوام دوست بجٹ پیش کرنے پر مبارکباد دیتے ہوئے کہاکہ پنجا ب کا بجٹ ہر ضلع کی یکساں ترقی کا روڈ میپ ہی-ڈسٹرکٹ کے علیحدہ ڈویلپمنٹ پیکیج سے صوبے میں ترقی کانیا دور شروع ہوگا-پنجاب کی تاریخ کا سب سے بہترین بجٹ پیش کر کے آپ نے عوام کے دل جیت لئے ہیں-وزیراعلیٰ عثمان بزدار نے اس موقع پر گفتگو کرتے ہوئے کہاکہ وزیر اعظم عمران خان کی قیادت میں پاکستان معاشی ترقی کی راہ پر گامزن ہو چکا ہے -موجودہ حالات میں انتشار کی سیاست کی کوئی گنجائش نہیں - افراتفری پھیلانے کی کوشش کرنے والے عناصر دشمن کے ایجنڈے پر چل رہے ہیں۔

(جاری ہے)

مایوسی کا شکار اپوزیشن عوام کو گمراہ نہیں کر سکتی۔انہوںنے کہاکہ مسلم لیگ ق ہماری اتحادی ہے اور اتحادیوں کے ساتھ تعلقات پہلے سے زیادہ مضبوط ہیں - اتحادی جماعت سے بہترین ورکنگ ریلیشن شپ ہے۔اتحادی جماعت کو ساتھ لے کر چل رہے ہیں - فیصلہ سازی کے عمل میں مسلم لیگ (ق) کو شریک کیا گیا ہے۔انہوںنے کہاکہ میرے دروازے ہمہ وقت کھلے ہیں - عوام کے مسائل کے حل کے لئے کوشاں ہیں - سب کو ساتھ لے کر چلتا ہوں - ماضی میں ون مین شو تھا اب فیصلے مشاورت سے ہوتے ہیں -ملاقات کرنے والوں میں چودھری لیاقت علی، سلیم سرور جوڑا، میاں محمد اختر حیات اورمحمدارشد چودھری شامل تھے -چیف وہپ پنجاب اسمبلی ایم پی اے سید عباس علی شاہ بھی موجود تھے