انگلینڈ،پاکستانی کرکٹر کے چھکے سے ان کی اپنی گاڑی کا شیشہ ٹوٹ گیا

ہیلی فیکس کرکٹ لیگ کراسلی شیلڈ کوارٹر فائنل میں کرکٹر آصف علی نے آئلنگورتھ سینٹ میری کرکٹ کلب کی جانب سے سینیٹ پیٹرس کیخلاف چھکا لگایا تو گیند باؤنڈری کے باہر انکی اپنی گاڑی کے شیشے پرجالگی جس سے پچھلا شیشہ چکنا چور ہوگیا

ذیشان مہتاب منگل 22 جون 2021 15:30

انگلینڈ،پاکستانی کرکٹر کے چھکے سے ان کی اپنی گاڑی کا شیشہ ٹوٹ گیا

لندن (اردو پوائنٹ تازہ ترین اخبار ۔ 22 جون 2021ء ) کرکٹ کے میدان میں چھکا لگتا ہے تو بیٹسمین کی جانب سے خوشی کا اظہار کیا جاتا ہے لیکن سوشل میڈیا پر ایک ایسی ویڈیو وائرل ہورہی ہے جس میں بیٹسمین چھکا مارنے کے بعد اپنا سر پکڑ لیتا ہے۔ انگلینڈ میں کلب کرکٹ کے دوران پاکستانی بلے باز کے شاندار چھکے سے ان کی اپنی گاڑی کا ہی شیشہ ٹوٹ گیا۔ ہیلی فیکس کرکٹ لیگ کراسلی شیلڈ کوارٹر فائنل میں کرکٹر آصف علی سینیٹ پیٹرس کے خلاف آئلنگورتھ سینٹ میری کرکٹ کلب کی نمائندگی کررہے تھے۔

(جاری ہے)

آصف علی نے شاندار چھکا لگایا جس سے گیند باؤنڈری کے باہر گئی لیکن آصف علی کو اس شاندار چھکے کے نتیجے میں مالی نقصان بھی برداشت کرنا پڑا۔ کرکٹر کے چھکے کی وجہ سے بال باؤنڈری کے باہر کھڑی آصف علی کی اپنی گاڑی کے شیشے پر جالگی جس سے گاڑی کا پچھلا شیشہ چکنا چور ہوگیا۔ بال اپنی گاڑی کی طرف جاتی دیکھ کر آصف علی نے سرتھام لیا اور پچ پر بیٹھ گئے جس کی ویڈیو سوشل میڈیا پر وائرل ہوگئی۔