پولیس اور حساس اداروں کی بڑی کامیابی، دستی بم حملوں کا ماسٹر مائنڈ گرفتار

ملزم رمیش کمار اعلی تعلیم یافتہ اور بم بنانے کا ماہر ہے، گرفتار ملزم نے اردو یونیورسٹی سے بی ایس فزکس اینڈ ٹیلی کام میں سند حاصل کررکھی ہے

منگل 13 جولائی 2021 15:55

کراچی (اُردو پوائنٹ اخبارتازہ ترین - این این آئی۔ 13 جولائی2021ء) ملک دشمن عناصر کے خلاف سندھ پولیس اور حساس اداروں کی کارروائیاں جاری ہے، ایسی ہی ایک کارروائی میں بڑی کامیابی حاصل ہوئی ہے۔تفصیلات کے مطابق کراچی میں پولیس اور حساس اداروں نے ایئرپورٹ کے علاقے بھٹائی آباد میں خفیہ اطلاعات پر کارروائی کی، مشترکہ کارروائی کے دوران کراچی میں متعدد بم حملوں کے ماسٹر مائنڈ رمیش کمار کو گرفتار کیا گیا۔

(جاری ہے)

پولیس حکام کے مطابق ملزم کالعدم جئے سندھ متحدہ محاذ شفیع برفت گروپ کا اہم رکن ہے،اور وہ دو ہزار دس سے پندرہ کے درمیان اڑتیس سے زائد بم دھماکوں کا ماسٹر مائنڈ ہے، ملزم رمیش کمار اعلی تعلیم یافتہ اور بم بنانے کا ماہر ہے، گرفتار ملزم نے اردو یونیورسٹی سے بی ایس فزکس اینڈ ٹیلی کام میں سند حاصل کررکھی ہے۔پولیس حکام کے مطابق دوران حراست ملزم نے شہر قائد میں ٹارگٹ کلنگ، ہنگامہ آرائی اور جلا گھیرؤا کا بھی اعتراف کیا ہے، رمیش کمار نے بتایا کہ بم دھماکوں کے احکامات جرمنی سے شفیع برفت کی جانب سے ملتے تھے۔

پولیس حکام کا کہنا ہے کہ ملزم سے دستی بم، دھماکاخیز مواد،بارودی تاریں،موبائل فون اور شناختی کارڈ برآمد کیا گیا ہے، ملزم سے مزید تفتیش جاری ہے، مزید اہم انکشافات متوقع ہے۔