حکومت نے صنعتی ملازمین اور ورک فورس کیلئے ویکسی نیشن کو لازمی قرار دے دیا

جمعہ 16 جولائی 2021 20:48

فیصل آباد(اُردو پوائنٹ اخبارتازہ ترین - آن لائن۔ 16 جولائی2021ء) حکومت نے صنعتی شعبہ میں کام کرنے والے ملازمین اور ورک فورس کیلئے کرونا سے بچائو کی ویکسی نیشن کو لازمی قرار دے دیا ہے اور فیصل آباد چیمبر آف کامرس اینڈانڈسٹری سے کہا ہے کہ وہ اس سلسلہ میں حکومتی فیصلے پر فوری عمل درآمد کیلئے اپنا کردار ادا کرے۔ فیصل آباد چیمبر آف کامرس اینڈانڈسٹری کے قائم مقام صدر چوہدری طلعت محمود نے فیصل آباد چیمبرکے ممبروں سے کہا ہے کہ وہ اس اطلاع کے دو دن کے اندر اندر اپنے ملازمین کی ویکسی نیشن کروائیں اور اگر انہیں اس سلسلہ میں کسی قسم کی مشکل پیش آئے تو وہ حکومت کے فوکل پرسن ڈاکٹر جنید سے ٹیلی فون پر رابطہ کر سکتے ہیں۔

مزید برآں فیصل آباد چیمبر نے تمام صنعتی اداروں کو ایک پر فارما بھی جاری کیا ہے جس میں فرم کے نام ، کل ملازمین، ویکسی نیشن کروانے والے یا کرونا کی پہلی خوراک لینے والے ملازمین کی تعداد کے علاوہ ویکسی نیشن نہ کرانے والی افرادی قوت کی تعداد بارے میں معلومات مہیا کرنا ہوں گی۔

(جاری ہے)

یہ پر فارما کرونا کی روک تھام میں مصروف اداروں کو مہیا کیا جائے گا۔ فیصل آباد چیمبر آف کامرس اینڈانڈسٹری نے متعلقہ تجارتی ایسوسی ایشنوں سے بھی درخواست کی ہے کہ وہ اپنے اپنے دائرہ اختیار میں آنے والے صنعتی مزدوروں کی فوری ویکسی نیشن کو یقینی بنائیں۔ چوہدری طلعت محمود نے کہا ہے کہ حکومتی ہدایات پر عمل نہ کرنے والے اداروں کے خلاف فوری کارروائی بھی کی جا سکتی ہے۔