آزاد کشمیر انتخابات،کے پی کے میں 2 حلقوں کیلئے پولنگ ہو گی

ہفتہ 24 جولائی 2021 19:10

پشاو ر(اُردو پوائنٹ اخبارتازہ ترین - این این آئی۔ 24 جولائی2021ء) خیبر پختون خوا میں آزاد کشمیر کے عام انتخابات کے لیے 2 حلقوں حلقہ ایل اے 45 کشمیر ویلی 6 اور ایل اے 39 جموں کے لیے پولنگ (آج) اتوار کو ہو گی۔پولنگ کے لیے انتخابی مواد کی تقسیم کا عمل مکمل کر لیا گیا ہے، خیبر پختون خوا سے انتخابات میں 6 ہزار 951 ووٹرز اپنا حقِ رائے دہی استعمال کریں گے۔

الیکشن کمیشن کے مطابق خیبر پختون خوا میں مجموعی طور پر 41 پولنگ اسٹیشنز بنائے گئے ہیں جن میں مردوں کے لیے 7، خواتین کے لیے 10 اور مشترکہ 24 پولنگ اسٹیشن شامل ہیں۔

(جاری ہے)

پشاور میں ووٹرز کی کل تعداد 1 ہزار 278 ہے جن میں مرد ووٹرز کی تعداد 686 اور خواتین ووٹرز کی تعداد 592 ہے۔کے پی کے دارالخلافہ پشاور میں 3 پولنگ اسٹیشن بنائے گئے ہیں۔خیبر پختون خوا میں آزاد کشمیر الیکشن کے سب سے زیادہ ووٹرز کی تعداد 3 ہزار 190 مانسہرہ میں ہے۔

الیکشن کمیشن کے مطابق پولنگ صبح 8 بجے سے شام 5 بجے تک جاری رہے گی، 400 سے زیادہ سیکیورٹی اہلکار پولنگ اسٹیشنوں پر تعینات کیئے گئے ہیں۔انتخابات میں 4 امیدوار میدان میں ہیں جن میں پی ٹی آئی سے عبدالماجد، جماعتِ اسلامی سے نورالباری اور عبدالناصر اور مشاہد مشتاق آزاد امید وار کے طور پر انتخابات لڑ رہے ہیں۔