ایل این جی کی ایشین اسپاٹ پرائسز رواں ہفتے اضافے کے بعد 6 ماہ کی بلند ترین سطح پر پہنچ گئی

درجہ حرارت بڑھنے کے باعث بجلی بنانے کے لیے استعمال ہونے والے ایندھن کی طلب میں اضافہ

ہفتہ 24 جولائی 2021 19:45

اسلام آباد (اُردو پوائنٹ اخبارتازہ ترین - این این آئی۔ 24 جولائی2021ء) لیکویفائیڈ نیچرل گیس (ایل این جی) کی ایشین اسپاٹ پرائسز رواں ہفتے اضافے کے بعد 6 ماہ کی بلند ترین سطح پر پہنچ گئی ہے،درجہ حرارت بڑھنے کے باعث بجلی بنانے کے لیے استعمال ہونے والے ایندھن کی طلب میں اضافہ ہوا ہے۔ذرائع کا کہنا تھا کہ ستمبر میں شمال مشرقی ایشیا میں ترسیل کے لیے ایل این جی کی اوسط قیمت کا اندازہ 14.45 فی میٹرک ملین برٹش تھرمل یونٹس (ایم ایم بی ٹی یو) لگایا گیا ہے جو گزشتہ ہفتے سے 1.15 ڈالر زیادہ ہے اور یہ جنوری کے وسط کے مقابلے بلند ترین سطح ہے۔

ریفینیٹیو آئکون کے موسم کے اعداد و شمار کے مطابق ایل این جی کے بڑے صارفین ٹوکیو، سیئول اور بییجنگ میں درجہ حرارت آئندہ دو ہفتوں تک اوسط سے زیادہ رہنے کا امکان ہے، جبکہ گرم موسم کے باعث امریکا اور یورپ میں بھی قدرتی گیس کی قیمتوں میں اضافہ دیکھا گیا ہے۔

(جاری ہے)

ذرائع نے کہا کہ چین کی گوانگزو گیس ڈاپینگ ٹرمینل کے لیے اگست میں ڈیلوری کے لیے کارگو تلاش کر رہی ہے جبکہ اس نے پہلے ڈیفو کے لیے 14.40 ڈالر فی ایم ایم بی ٹی یو کی قیمت پر کارگو خریدا تھا۔

ذرائع کے مطابق تائیوان کی سی پی سی نے ستمبر میں ترسیل کے لیے 14.50 ڈالر فی ایم ایم بی ٹی یو کے حساب سے ممکنہ طور پر کارگو خریدا ہے۔ذرائع نے کہا کہ پاکستان ایل پی جی بھی ستمبر میں ترسیل کے لیے 4 کارگوز کی تلاش میں ہے جبکہ گیل (بھارت) نے تبادلے کا ٹینڈر جاری کیا ہے جس میں امریکا سے بھارت کے لیے کارگو لوڈ کرنے پیشکش کی جارہی ہے۔