مقبوضہ ریاست کے عوام بھارتی ریاست سے لاتعلق ہیں ،انہیں دورے سے کوئی دلچسپی نہیں ہے،سردار مسعود خان

بھارت نے کشمیر کے حصے بخرے کر کے اسے نہ صرف بھارتی یونین میں ضم کیا بلکہ مذموم عزائم کی تکمیل کیلئے مقبوضہ کشمیر کی مسلم اکثریت کو اقلیت میں بدل کر اسے ہندو راشٹرا بنانے کی پالیسی پر بھی گامزن ہے، صدر آزاد کشمیر

منگل 27 جولائی 2021 17:33

مظفرآباد(اُردو پوائنٹ اخبارتازہ ترین - این این آئی۔ 27 جولائی2021ء) آزاد جموں و کشمیر کے صدر سردار مسعود خان نے بھارتی صدر رام ناتھ کوونڈ کے مقبوضہ جموں و کشمیر کے دورہ کی مذمت کرتے ہوئے کہا کہ مقبوضہ ریاست کے عوام بھارتی ریاست سے لاتعلق ہیں اور انہیں اس دورے سے کوئی دلچسپی نہیں ہے۔ انہوں نے مقبوضہ جموں و کشمیر کے عوام کو گزشتہ ساتھ دہائیوں سے بالعموم اور گزشتہ تیس سال سے بالخصوص ظلم و ستم کا نشانہ بنایا گیا اور بھارت کی موجودہ حکمران جماعت بی جے پی تو جبر و استبداد کی تمام حدوں کو عبور کر کے متنازعہ ریاست کو دو حصوں میں تقسیم کر کے اسے بھارتی یونین کا حصہ بنا دیا ہے جو اقوام متحدہ کی قرار دادوں اور بین الاقوامی قوانین کی کھلی خلاف ورزی ہے۔

بھارت کے اس اقدام کو نہ صرف مقبوضہ کشمیر کی آزادی پسند جماعتوں بلکہ بھارت نواز جماعتوں نے بھی مسترد کر دیا ہے۔

(جاری ہے)

انہوں نے کہا کہ بھارت نے نہ صرف کشمیر کے حصے بخرے کر کے اسے بھارتی یونین میں ضم کیا ہے بلکہ اپنے مذموم عزائم کی تکمیل کے لیے وہ مقبوضہ کشمیر کی مسلم اکثریت کو اقلیت میں بدل کر اسے ہندو راشٹرا بنانے کی پالیسی پر بھی گامزن ہے۔

صدر سردار مسعود خان نے بھارتی صدر کی سرینگر آمد کے موقع پر کل جماعتی حریت کانفرنس کی احتجاجی کال کی مکمل حمایت کرتے ہوئے کہا کہ آزاد کشمیر اور پاکستان کے عوام مقبوضہ کشمیر کی حریت قیادت کے عزم و استقلال کو سلام پیش کرتے ہیں اور انہیں یقین دلاتے ہیں کہ وہ اپنی جدوجہد آزادی میں تنہا نہیں بلکہ آزاد کشمیر کے چالیس لاکھ اور پاکستان کے بائیس کروڑ عوام ان کے ساتھ ہیں۔