معروف بھارتی اداکار کی گاڑی سے ٹکرا کر ایک شخص ہلاک

پولیس نے مقدمہ درج کر لیا تاہم اداکار کو تاحال گرفتار نہیں کیا گیا

جمعرات 9 ستمبر 2021 11:05

ممبئی (اُردو پوائنٹ اخبارتازہ ترین - این این آئی۔ 09 ستمبر2021ء) بھارت کے معروف اداکار اور ٹی وی پروڈیوسر رجًت بیدی کی گاڑی سے ٹکرانے والا مزدور گزشتہ روز اسپتال میں دورانِ علاج دم توڑ گیا۔بھارتی میڈیا کے مطابق راجیش بودھ نامی مزدور نشے کی حالت میں سڑک پار کرتے ہوئے اچانک رجت بیدی کی گاڑی کے سامنے آگیا جس کے بعد اسے زخمی حالت میں ممبئی کے کوپر اسپتال میں داخل کروایا گیا تھا۔

(جاری ہے)

پولیس نے بتایا کہ اداکار زخمی شخص کو اسپتال لے گئے اور پھر ڈی این نگر پولیس اسٹیشن میں واقعے کے بارے میں آن ڈیوٹی پولیس افسر کو آگاہ کیا۔پولیس کی جانب سے رجت بیدی کے خلاف دفعات 279 (جلد باز ی میں ڈرائیونگ) اور 338 (دوسروں کی زندگی کو خطرے سے دوچار کرنا یا خود کو نقصان پہنچانا) کے تحت مقدمہ درج کرلیا تاہم اداکار کو تاحال گرفتار نہیں کیا گیا ہے۔خیال رہے کہ رجت بیدی نے جن مقبول فلموں میں معاون کردار ادا کیا ان میں ہریتھک روشن کی’’کوئی مِل گیا‘‘ اور سلمان خان کی فلم’’پارٹنر‘‘ شامل ہیں۔