ڈینگی کی افزائش سے متعلق ٹھوس منصوبہ بندی کی بدولت ہی ڈینگی کا خاتمہ ممکن بنایا جا سکتا ہے، ڈپٹی کمشنر

نارووال(اُردو پوائنٹ اخبارتازہ ترین - اے پی پی۔ 14 ستمبر2021ء) ڈپٹی کمشنرنبیلہ عرفان  نے کہاہے کہ ضلع بھر میں ڈینگی مچھر کے تدارک اور اس سے بچاؤ کے حوالہ سے بھرپور اقدامات اٹھائے جائیں،اس ضمن میں محکمہ صحت کے علاوہ تمام متعلقہ محکموں پر بھاری ذمہ داری عائد ہوتی ہے کہ وہ موثر کوآرڈینیشن کے ذریعے ڈینگی کے خاتمہ کے لئے سنجیدہ کوششیں کریں،مون سون موسم کے دوران تمام ان ڈور اور آﺅٹ ڈور سرویلنس ٹیمیں متحرک رہیں،ڈینگی کی افزائش سے متعلق ٹھوس منصوبہ بندی کی بدولت ہی ڈینگی کا خاتمہ ممکن بنایا جا سکتا ہے۔

ان خیالات کا اظہار انہوں نے ڈسٹرکٹ ایمرجنسی ریسپانس کمیٹی کے اجلاس کی صدارت کرتے ہوئے کیا۔سی ای او ہیلتھ ڈاکٹر محمد خالدجاوید،فوکل پرسن ڈی ایچ او ڈاکٹر محمد طارق،ڈسٹرکٹ کوارڈی نیٹر برائے نیشنل پرگرام ڈاکٹرسیدمحمد نویدحیدر،ڈسٹرکٹ انٹامالوجسٹ امانت علی،سی ڈی سی آفیسر سیلمان خاں،ڈی او انڈسٹریز ذیشان نیاز،ڈپٹی ڈائریکٹر لوکل گورنمنٹ اسلم گھمن،ڈپٹی ڈائریکٹر زراعت محمد عارف چوہدری،اے ڈی فشریزمحمد نواز،اے ڈی ایل ڈاکٹر محمد سعید کے علاوہ دیگر متعلقہ محکموں کے افسران نے شرکت کی ۔

(جاری ہے)

اجلاس میں انسداد ڈینگی کے حوالہ سے جاری مہم کی کارکردگی اورمحکمانہ سروسز کے ساتھ ساتھ کورونا کے حوالے سے بھی کئے جانے والے اقدامات  کا جائزہ بھی لیاگیا ۔ڈپٹی کمشنرنارووال نے کہا کہ انسداد ڈینگی کے خاتمہ کے حوالہ سے تمام محکمے موثر حکمت عملی اور ٹیم ورک کے تحت مشن کو جاری رکھیں ، غفلت اور لاپرواہی کا مظاہرہ کرنے والے متعلقہ افسران کے  خلاف کارروائی عمل میں لائی جائے،  ڈینگی کی افزائش کے تمام ممکنہ مقامات کی باقاعدگی سے انڈور اور آوٹ ڈور سرویلنس جاری رکھی جائے قبرستانوں،پارکوں،پانی کے تالابوں گھروں کی چھتوں، گملوں،سروس اسٹیشنز، پرانے ٹائروں اور تمام ممکنہ ہاٹ سپاٹ جہاں ڈینگی مچھر کی افزائش ممکن ہو ایسے تمام جگہوں کو فوری صاف کریں تاکہ پانی کے جمع ہونے سے ڈینگی مچھر کا لاروا پرورش نہ پاسکے۔

اس ضمن میں کارکردگی رپورٹ سے مسلسل آگاہ رکھا جائے۔