افغانستان پر کنٹرول کے بعد کورونا کی شرح کم ہوگئی، طالبان رہنما

افغانستان میں جنگ میں ہونے والی ہلاکتوں اور زخمیوں کی تعداد بھی صفر ہوگئی ہے، انس حقانی

ہفتہ 18 ستمبر 2021 23:56

کابل (اُردو پوائنٹ اخبارتازہ ترین - آن لائن۔ 18 ستمبر2021ء) طالبان کے سینیئر رہنما اور حقانی نیٹ ورک کے سربراہ جلال الدین حقانی کے بیٹے انس حقانی نے دعویٰ کیا ہے کہ افغانستان پر طالبان کے کنٹرول کے بعد کورونا کیسز کی شرح میں ڈرامائی طور پر کمی ہوئی ہے۔

(جاری ہے)

غیرملکی خبررساںادارے کے مطابق گزشتہ روز انس حقانی نے کابل میں صحافیوں سے ملاقات میں کہا کہ افغانستان پر طالبان کے کنٹرول کے بعد کابل میں کورونا مثبت کیسز کی شرح صفر ہوگئی ہے۔

دریں اثناء صحافی کی جانب سے ٹوئٹ پر انس حقانی نے بھی ٹوئٹ کی اور ایک بار پھر اپنے دعوے کو دہرایا کہ طالبان کے کنٹرول کے بعد افغانستان میں کورونا کیسز کی شرح میں ڈرامائی طور پر کمی ہوئی ہے۔ان کا کہنا تھاکہ ملک میں جنگ میں ہونے والی ہلاکتوں اور زخمیوں کی تعداد بھی صفر ہوگئی ہے۔خیال رہے کہ طالبان نے 15 اگست کو کابل کا کنٹرول سنبھالا تھا اور گزشتہ دنوں ہی عبوری حکومت کا اعلان کیا ہے۔