کوئلے سے چلنے والے پاور پلانٹس ختم‘ چین کو 50 ارب ڈالر کے نقصان کا امکان

شنگھائی(اُردو پوائنٹ اخبارتازہ ترین - این این آئی۔ 23 ستمبر2021ء) ماہرین نے کہا ہے کہ کاربن کے اخراج کو کم کرنے کے لیے چین کی جانب سے بیرون مالک میں کوئلے سے چلنے والے پاور پلانٹس کی تعمیر روکنے کے نتیجے میں 50 ارب ڈالر کی سرمایہ کاری متاثر ہوسکتی ہے۔ چین کے صدر شی جن پنگ نے اقوام متحدہ کی جنرل اسمبلی میں پہلے سے ریکارڈ شدہ خطاب میں کہا کہ چین ترقی پذیر ممالک کو سبز توانائی کی پیداوار اور بیرون ملک کول پاور پلانٹس کی تعمیر روکنے میں مدد کرے گا۔

چین بین الاقوامی دباؤ کا شکار ہے کہ وہ بیرون ملک کوئلے کی سرمایہ کو ختم کرنے کا اعلان کرے تاکہ اقوام متحدہ میں ماحولیات سے متعلق وعدوں کی تکمیل کرسکے۔بیجنگ عالمی سطح پر کول پاور پلانٹس کے لیے سرمایہ کاری کا سب سے بڑا ذریعہ ہے اور چین کے اعلان کے بعد بنگلہ دیش، انڈونیشیا، ویت نام، پاکستان اور جنوبی افریقہ جیسے ممالک میں کوئلے سے بجلی کی توسیع کے منصوبوں پر دور رس اثر پڑے گا۔

(جاری ہے)

امریکی تھنک ٹینک گلوبل انرجی مانیٹر (جی ای ایم) کے مطابق یہ اعلان چینی ریاست کی مالی اعانت کے لیے مختص کیے گئے 44 کول پلانٹس کو متاثر کر سکتا ہے۔جی ای ایم نے کہا کہ اس سے مستقبل میں کاربن ڈائی آکسائیڈ کے اخراج کو سالانہ 20 کروڑ ٹن تک کم کرنے کی گنجائش پیدا ہوگی۔جی ای ایم کے کوئلے پروگرام کی ڈائریکٹر کرسٹین شیئر نے کہا کہ چین کا اعلان رواں سال موسمیاتی محاذ پر ایک اہم پیش رفت ہے۔

انہوں نے کہا کہ ہمیں امید ہے کہ بہت سے ممالک بجلی کی پیداوار کے متبادل ذرائع اپنائیں گے اور انہیں قابل تجدید توانائی فراہم کیے جانے میں تعاون کیا جائے گا۔ماحولیاتی گروہوں نے یہ بھی کہا کہ چینی صدر کا بیان بینک آف چائنا جیسے بڑے اداروں کو مجبور کرے گا کہ وہ 10 گیگا واٹ کے بیرون ملک کوئلے سے بجلی کی پیدا کرنے والے منصوبوں سے منسوب ہیں، وہ ان منصوبے سے دستبرداری کا اوقات کار تیار کریں۔

چین کے بعد جنوبی کوریا اور جاپان نے بھی رواں برس بیرون ممالک کول پاور پلانٹس کے منصوبوں سے متعلق فیصلے کیے ہیں۔چین کی جانب سے مذکورہ فیصلہ موسمیاتی تبدیلی سے نمٹنے میں ترقی پذیر ممالک کی مدد کے اخراجات کو دوگنا کرنے کے امریکی فیصلے کے بعد سامنے آیا۔بیجنگ کے فیصلے سے چند گھنٹے قبل امریکی صدر جوبائیڈن نے وعدہ کیا تھا کہ موسمیاتی تبدیلی سے نمٹنے میں ترقی پذیر ممالک کی مدد میں درکار اخراجات کو دوگنا کیا جائے گا جو 2024 تک 11 ارب 40 کروڑ ڈالر تک ہوسکتاہے۔

بوسٹن یونیورسٹی گلوبل ڈیولپمنٹ پالیسی سینٹر کے اعداد و شمار کے مطابق جنوبی افریقہ، پاکستان، انڈونیشیا، ویت نام، بنگلہ دیش، زمبابوے، سربیا اور متحدہ عرب امارات میں 20 سے زائد منصبوبے چین کی مالی اعانت تعمیراتی مراحل میں ہیں جبکہ دیگر 17 پلاننگ کا حصہ ہیں۔ مالیاتی ڈیٹا فراہم کرنے والے لیڈ کاربن تجزیہ کار یان کن نے کہا بیرون ملک میں کوئلے کے اخراج، انہیں بند کرنے، سرکاری اور نجی فنانسنگ کے درمیان علیحدگی سے متعلق کوئی تفصیلات فراہم نہیں کی گئی ہیں۔