کراچی ،ڈیفنس کے گھروں کی ڈکیتیوں میں ملوث گروہ ایڈیشنل آئی جی موٹروے کی گاڑی پر فائرنگ میں ملوث نکلا

پیر 18 اکتوبر 2021 18:30

کراچی(اُردو پوائنٹ اخبارتازہ ترین - این این آئی۔ 18 اکتوبر2021ء) ڈسٹرکٹ سائوتھ پولیس کے ہاتھوں ڈیفنس کے گھروں کی ڈکیتیوں میں ملوث گروہ ایڈیشنل آئی جی موٹروے کی گاڑی پر فائرنگ میں ملوث نکلا۔تفصیلات کے مطابق کراچی کے علاقے ڈیفنس کے گھروں میں ڈکیتیوں میں ملوث گرفتار گروہ کی وارداتوں کی تفصیلات سامنے آگئیں، حکام نے بتایا کہ گرفتار ملزمان کاگروہ مفرور ملزم بلال نے تشکیل دیا تھا۔

(جاری ہے)

پولیس کے مطابق ملزم بلال اور ساتھی فتح جنگ انٹرچینج پر ایڈیشنل آئی جی موٹروے کی گاڑی پر فائرنگ میں ملوث ہیں، فائرنگ کے واقعے میں ایڈیشنل آئی جی موٹروے سجاد افضل زخمی جبکہ ان کا بھائی نعمان افضل جاں بحق ہوا تھا۔حکام نے بتایا کہ گرفتار ملزم سکندر سے برآمد ہونے والا اسلحہ ڈیفنس کے گھر میں کی گئی ڈکیتی کی واردات سے میچ ہوگیا اور ملزم کو متاثرہ فیملیز نے بھی باقاعدہ شناخت کرلیا ہے۔

حکام کے مطابق ملزمان ڈکیتیوں کے دوران یرغمال فیملی پر تشدد کرتے تھے اور اور لوٹ مار کے بعد فرار ہوجاتے تھے ، گروہ کا مرکزی سرغنہ بلال اور دیگر دو ساتھیوں سمیت فرار ہے جبکہ گرفتار ملزمان سے مفرور ساتھیوں سے متعلق پوچھ گچھ جاری ہے۔تفتیشی حکام کے مطابق ملزمان کا گروپ مختلف شہروں میں وادراتیں کرتا ہے۔