ٹی ٹونٹی ورلڈکپ، مستفیض کی شاندار باؤلنگ، بنگلا دیش نے عمان کو زیر کر لیا

مسقط (اردو پوائنٹ تازہ ترین اخبار ۔ 19 اکتوبر 2021ء ) ٹی ٹونٹی ورلڈکپ کے پہلے مرحلے کے دوران 6 ویں میچ میں مستفیض الرحمان کی شاندار باؤلنگ کے باعث بنگلا دیش نے عمان کو زیر کرلیا۔ الامارات کرکٹ گراؤنڈ مسقط میں کھیلے گئے اس میچ میں بنگلادیش نے ٹاس جیت کر پہلے بیٹنگ کرنے کا فیصلہ کیا تھا۔ عمان نے اپنے سے کئی زیادہ تجربہ کار بنگلادیشی ٹیم کے ابتدائی 2 بلے باز لٹن داس اور مہدی حسن کو 21 کے مجموعے پر ہی آؤٹ کردیا تھا۔

تجربہ کار شکیب الحسن نے نوجوان بیٹسمین محمد نعیم کے ہمراہ 80 رنز کی شاندار شراکت بنا کر ٹیم کو پریشانی کے بھنور سے نکال دیا۔ اس مجموعے پر شکیب الحسن 42 رنز بنا کر آؤٹ ہوگئے، محمد نعیم نے اپنا روایتی کھیل جاری رکھا تاہم دوسرے اینڈ سے وکٹیں گرتی رہیں تو 64 رنز کی شاندار اننگز کھیلنے والے محمد نعیم بھی دباؤ میں آکر پویلین لوٹ گئے۔

(جاری ہے)

اننگز کے آخری لمحات میں محموداللہ کے 17 رنز کی بدولت بنگلادیش کی ٹیم 153 رنز بنا کر آل آؤٹ ہوگئی۔

عمان کی جانب سے بلال خان اور محمد نعیم نے عمدہ بولنگ کرتے ہوئے 3، 3 کھلاڑیوں کو آؤٹ کیا جبکہ کلیم اللہ نے دو اور ذیشان مقصود نے ایک وکٹ لی۔ہدف کے تعاقب میں عمان کی ٹیم 9 وکٹوں کے نقصان پر 127 رنز بنا سکی۔ جیتندر سنگھ 40، کیشپ 21 سکور بنا کر نمایاں رہے۔ مستفیض نے 4 جبکہ شکیب نے 3 کھلاڑیوں کو پویلین بھیجا۔ سیف الدین اور مہدی حسن کے حصے میں ایک ایک وکٹ آئی۔ واضح رہے کہ یہ میچ بنگلادیش کے لیے آر یا پار کی حیثیت رکھتا ہے، اس میں ناکامی کی صورت میں بنگلادیشی ٹیم ایونٹ سے باہر ہوجائے گی۔ گزشتہ میچ میں سکاٹ لینڈ نے بنگلا دیش کو اپ سیٹ کرتے ہوئے 6 رنز سے شکست دی تھی۔