مینز ٹی ٹونٹی ورلڈ کپ،سکاٹ لینڈ نے پاپوانیوگنی کو 17رنز سے ہرا کر مسلسل دوسری کامیابی حاصل کر لی،بیرنگٹن کی 70رنز کی جارحانہ اننگز،مردمیدان قرار

بدھ 20 اکتوبر 2021 14:47

مسقط(اُردو پوائنٹ اخبارتازہ ترین - این این آئی۔ 20 اکتوبر2021ء) آئی سی سی مینز ٹی ٹونٹی ورلڈکپ کرکٹ ٹورنامنٹ میں سکاٹ لینڈ نے پاپوانیوگنی کو 17 رنز سے شکست دے کر مسلسل دوسری کامیابی حاصل کر لی، پاپوا نیوگنی کی ٹیم 165 رنز کے ہدف کے تعاقب میں آخری اوور میں 148 رنز پر ڈھیر ہوگئی ، بیرنگٹن میچ کے بہترین کھلاڑی قرار پائے۔

(جاری ہے)

العمارات گرائونڈ میں کھیلے گئے پہلے رائونڈ کے گروپ بی میچ میں سکاٹش ٹیم نے پہلے بیٹنگ کرتے ہوئے مقررہ اوورز میں 9 وکٹوں کے نقصان پر 165رنز بنائے، رچی بیرنگٹن نے جارحانہ بلے بازی کا مظاہرہ کرتے ہوئے حریف بائولرز کی خوب دھنائی کی، انہوں نے 49 گیندوں پر 3 چھکوں اور 6 چوکوں کی مدد سے 70 رنز کی اننگز کھیلی، میتھیوکراس 45 رنز بنا کر دوسرے نمایاں بلے باز رہے، جارج مونسی 15 رنز بنا سکے، کابوا نے 4 اور چیڈ سوپر نے 3 وکٹیں لیں۔

جواب میں پاپوا نیوگنی کی ٹیم مطلوبہ ہدف حاصل کرنے میں ناکام رہی اور پوری ٹیم آخری اوور کی تیسری گیند پر 148 رنز بنا کر پویلین لوٹ گئی، نورمان وانوا کے سوا کوئی بھی بلے باز خاطرخواہ کارکردگی کا مظاہرہ نہ کر سکا، وانوا 47 رنز بنا کر نمایاں رہے، جوش ڈیوی نے 4 کھلاڑیوں کو آئوٹ کیا۔