میری شادی سو فیصدوالدین کی مرضی سے ہوئی تھی ، انضمام الحق

میں نے پسند کی شادی کی ، اس میں والدین کی مرضی بھی شامل تھی، مشتاق احمد

جمعہ 22 اکتوبر 2021 13:30

اسلام آباد (اُردو پوائنٹ اخبارتازہ ترین - این این آئی۔ 22 اکتوبر2021ء) قومی ٹیم کے سابق کپتان انضمام الحق نے کہا ہے کہ میری شادی سو فیصدوالدین کی مرضی سے ہوئی تھی ۔ ایک انٹرویومیں جب سابق ٹیسٹ کرکٹرز سے پوچھا گیا کہ کتنے فیصد لوگ والدین کی پسند اور کتنے فیصد اپنی مرضی سے شادی کرتے ہیں قومی ٹیم کے سابق کپتان انضمام الحق نے دوران شو بتایا کہ ان کی شادی 100 فیصد والدین کی مرضی سے ہوئی تھی۔

اس موقع پر مشتاق احمد نے کہا کہ میں نے پسند کی شادی کی لیکن اس میں والدین کی مرضی بھی شامل تھی۔

(جاری ہے)

سابق لیگ اسپنر نے بتایا کہ میری اہلیہ سے شادی سے پہلے ملاقات کی کہانی بھی بہت ہی دلچسپ ہے، ہم لوگ ایک عشائیے پر گئے ہوئے تھے، وقار یونس اور عاقب جاوید بھی میرے ساتھ تھے تو ایک خاتون ان سے آٹو گراف لے رہی تھیں۔مشتاق احمد نے بتایا کہ میں نے ان خاتون سے کہا کہ میں بھی تو کھلاڑی ہوں، آپ میرا آٹو گراف بھی تو لیں تو بس یہیں سے ہمارے درمیان دوستی کا آغاز ہوا اور پھر ہماری شادی ہو گئی۔مشتاق احمد نے بتایاکہ پاکستان میں 45 فیصد افراد والدین کی مرضی سے شادی کرتے ہیں اور 55 فیصد پسند کی شادی کرتے ہیں۔