کوئنٹن ڈی کوک نے گھٹنے نہ ٹیکنے پر معافی مانگ لی

اگر میرے گُھٹنے ٹیکنے سے دوسروں کو تعلیم دینے میں مدد ملتی ہے، دوسروں کی زندگیاں بہترہوتی ہیں تو میں ایسا کرنے میں خوشی محسوس کروںگا: وکٹ کیپر بلے باز

ذیشان مہتاب جمعرات 28 اکتوبر 2021 13:08

کوئنٹن ڈی کوک نے گھٹنے نہ ٹیکنے پر معافی مانگ لی

دبئی (اردو پوائنٹ تازہ ترین اخبار ۔ 28 اکتوبر 2021ء ) آئی سی سی مینز ٹی ٹونٹی ورلڈ کپ سپر 12 مرحلے میں ویسٹ انڈیز کے خلاف میچ سے قبل پیش آنے والے تنازع پر جنوبی افریقی کرکٹر کوئنٹن ڈی کوک نے معافی مانگ لی۔ 29 سالہ کوئنٹن ڈی کوک نے جنوبی افریقی کرکٹ بورڈ کے بلیک لائیوز میٹرز مہم سے اظہارِ یکجہتی کیلئے ایک گُھٹنے پر بیٹھنے کی ہدایت ماننے سے انکار کیا تھا اور میچ سے ہی دستبردار ہوگئے تھے۔

اب کوئنٹن ڈی کوک نے اپنی ٹیم کے ساتھیوں اور مداحوں سے اپنے اس رویے کے لیے معافی مانگی ہے ۔

(جاری ہے)

انہوں نے اپنے بیان میں کہا کہ ’اگر میرے گُھٹنے ٹیکنے سے دوسروں کو تعلیم دینے میں مدد ملتی ہے، اور دوسروں کی زندگیوں میں بہتری آتی ہے تو میں ایسا کرنے میں خوشی محسوس کروں گا‘۔

اس میچ سے قبل جنوبی افریقی کرکٹرز اپنے انداز میں نسلی تعصب کیخلاف مہم میں کردار ادا کر رہے تھے، تاہم کرکٹ ساؤتھ افریقا نے تمام پلیئرز کو ایک جیسا عمل کرنے کی ہدایت دی تھی۔