سندھ ہائی کورٹ،شرجیل میمن کا ای سی ایل سے نام نکالنے کی درخواست منظور ،10لاکھ روپے زر ضمانت جمع کرانے کا حکم

شرجیل میمن کے بیرون ملک جانے پر اعتراض نہیں، بیرون ملک سفر کرناان کا بنیادی حق ہے،زر ضمانت کے عوض اجازت دے دی جائے، نیب پراسیکیوٹر

پیر 15 نومبر 2021 16:25

سندھ ہائی کورٹ،شرجیل میمن کا ای سی ایل سے نام نکالنے کی درخواست منظور ..

کراچی(اُردو پوائنٹ اخبارتازہ ترین - این این آئی۔ 15 نومبر2021ء) سندھ ہائیکورٹ نے رہنما پیپلزپارٹی شرجیل میمن کانام عارضی طور پر ای سی ایل سے نکالنے کی درخواست منظور کرتے ہوئے 10 لاکھ روپے کے مچلکے جمع کرانے کا حکم دے دیا۔پیرکوسندھ ہائی کورٹ میں جسٹس کے کے آغا کی سربراہی میں بینچ نے پیپلز پارٹی کے رہنما شرجیل میمن کی ای سی ایل سے نام نکالنے کی درخواست پر سماعت کی۔

وکلا نے عدالت میں موقف دیا کہ وفاق اور نیب کو شرجیل میمن کے بیرون ملک جانے پر اعتراض نہیں۔ پراسیکیوٹر نیب نے موقف دیا کہ بیرون ملک سفر کرنا شرجیل میمن کا بنیادی حق ہے۔شرجیل میمن کو زر ضمانت کے عوض اجازت دے دی جائے۔ اسسٹنٹ اٹارنی جنرل ارشاد بندھانی نے موقف اپنایا کہ ہمارا بھی یہی کہنا ہے۔ عدالت نے شرجیل میمن کو دبئی جانے کی اجازت دے دی۔

(جاری ہے)

عدالت نے ریمارکس دیئے شرجیل میمن یکم اپریل 2022 سے قبل واپس آجائیں۔ عدالت نے شرجیل میمن کو 10 لاکھ روپے بطور زر ضمانت جمع کرانے کا حکم دیدیا۔ درخواستگزار کے وکیل راج علی واحد ایڈوکیٹ نے موقف اپنایا تھا کہ شرجیل میمن کو حکومت سندھ نے عرب امارات میں ہونیوالے فیسٹول کیلیے فوکل پرسن مقرر کیا ہے۔ فوکل پرسن کی حیثیت سے شرجیل میمن کو 15 نومبر سے فیسٹول میں شرکت کرنی ہے۔ شرجیل میمن ایکسپو میں سندھ حکومت کی نمائندگی کریں گے۔ نیب کے مطابق شرجیل میمن کیخلاف 2 ریفرنسز دائر ہوچکے اور 4 انکوائریاں جاری ہیں۔