این او سی کی حامل عمارت کو توڑا جارہا ہے، ممبر آباد اویس تھانوی

جمعہ 26 نومبر 2021 19:40

کراچی (اُردو پوائنٹ اخبارتازہ ترین - این این آئی۔ 26 نومبر2021ء) ایسوسی ایشن آف بلڈرز اینڈ ڈیولپرز(آباد)کے ممبر اویس تھانوی نے کہا ہے کہ نو آبجیکشن سرٹیفکیٹ (این او سی)دینے کے بعد بھی عمارت کو توڑا جارہا ہے۔نسلہ ٹاور کے باہر میڈیاسے گفتگو میں اویس تھانوی نے کہا کہ سندھ بلڈنگ کنٹرول اتھارٹی(ایس بی سی ای)سے این او سی لینے کے باوجود عمارت کو توڑا جارہا ہے۔

انہوں نے کہا کہ پر امن احتجاج کے باوجو ہم پر لاٹھی چارج کیا گیا، ایس بی سی اے کی اجازت کے باوجود بھی عمارت توڑی جارہی ہے تو ہمیں اس ادارے کا نام بتائیں، جہاں سے این او سی لے سکیں۔اویس تھانوی نے کہا کہ ہم نے سندھ بلڈنگ کنٹرول اتھارٹی سے منظوری لی ہے، اگر یہ فٹ پاتھ تھا اور سروس روڈ تھا تو ڈی جی ایس بی سی اے کو لٹکائیں۔

(جاری ہے)

انہوںنے کہا کہ اگر مسئلہ تھا تو ایس بی سی اے نے این اوسی کیوں دی لوگوں نے کروڑوں کی سرمایہ کاری کی اور انہیں بے گھر کر دیا گیا۔

ممبر آباد نے کہا کہ چیئرمین آباد اور دیگر ممبران کو شیل مارے گئے اور دیگر پر لاٹھی چارج کیا گیا، چاہتے ہیں وزیراعلی سندھ سید مراد علی شاہ اور دیگر ہم سے بات کریں۔انہوں نے کہا کہ اسلام آباد کی عمارتوں کو ریگولرائز کیا جاسکتا ہے تو کراچی کی کیوں نہیں، ریگولرائزیشن کا کوئی قانون ہے تو اسے ریگولرائز کیا جائے، ہماری بات سنی جائے اور مذاکرات کیے جائیں۔