وزیر اعلی عثمان بزدار کا پنجاب کی یونیورسٹیوں میں بلوچستان کی طالبات کیلئے مختص نشستیں بڑھانے کا اعلان

وزیر اعلی عثمان بزدار سے کوئٹہ وزیر اعلی بلوچستان سیکرٹریٹ میں وزیر اعلی عبدالقدو س بزنجو، وزراء اور ارکان اسمبلی کی ملاقاتیں ڈپٹی سپیکر قومی اسمبلی قاسم خان سوری اور حزب اختلاف کے ارکان صوبائی اسمبلی بھی ملاقات میں موجود تھے بلوچستان میں مزید ہسپتال بنائیں گے اور ہیلتھ ورکروں کو ٹریننگ بھی دیں گے، سرحد ی چیکنگ میں آسانی لائی جائے گی ‘عثمان بزدار مل جل کر پاکستان کی خدمت کریں گے ، پنجاب کے تعاون کو قدر کی نگاہ سے دیکھتے ہیں‘عبدالقدوس بزنجووزیراعلی بلوچستان

ہفتہ 27 نومبر 2021 23:46

لاہور(اُردو پوائنٹ اخبارتازہ ترین - این این آئی۔ 27 نومبر2021ء) وزیراعلی پنجاب سردار عثمان بزدارنے کوئٹہ میں وزیراعلی بلوچستان سیکریٹریٹ میں وزیراعلی بلوچستان میر عبدالقدوس بزنجو کی قیادت میں صوبائی وزراء اور اراکین صوبائی اسمبلی نے ملاقات کی- ملاقات میں ڈپٹی اسپیکر قومی اسمبلی قاسم خان سوری اور حزب اختلاف کے اراکین صوبائی اسمبلی بھی موجود تھی- وزیر اعلی عثمان بزدار نے اس موقع پر پنجاب کی یونیورسٹیوں میں بلوچستان کی طالبات کے لئے مختص نشستیں کی تعداد دگنا کرنے کااعلان کیا- وزیر اعلی عثمان بزدار نے گفتگو کرتے ہوئے کہا کہ پنجاب بڑے بھائی کی حیثیت سے بلوچستان کے ہر شعبہ میں معاونت جاری رکھے گا۔

بلوچستان کو اپنا دوسرا گھر سمجھتے ہیں۔بلوچستان کے عوام بھی پنجاب کو اپنا گھر سمجھیں۔

(جاری ہے)

بلوچستان کے عوام اور عوامی نمائندوں کو پنجاب میں ہمیشہ بھرپور عزت و احترام ملے گا۔ وزیر اعلی عثمان بزدار نے کہا کہ بلوچستان کے دیگر اضلاع میں بھی اسپتال بنائیں گے۔پنجاب اور بلوچستان کی سرحد پر چیکنگ کے نظام کو آسان اور سہل بنائیں گے۔بلوچستان کے صحت ورکرز کو پنجاب میں ٹریننگ بھی دی جائے گی۔

وزیراعلی بلوچستان میر عبدالقدوس بزنجو نے کہا کہ مل جل کر پاکستان اور اپنے صوبوں کی خدمت کرنا ہے۔بلوچستان کے عوام صحت مواصلات تعلیم سمیت دیگر شعبوں میں پنجاب کے تعاون کو قدر کی نگاہ سے دیکھتے ہیں۔وزیراعلی سردار عثمان بزدار کے دور حکومت میں دونوں صوبوں کے مابین معاونت میں اضافہ ہوا ہے۔