فلم انڈسٹری کوترقی کیلئے ابھی بہت سی منزلیں طے کرنا ہوں گی، سارہ لورین

:لاہور (اُردو پوائنٹ اخبارتازہ ترین - آن لائن۔ 01 دسمبر2021ء) معروف اداکارہ وماڈل سارہ لورین نے کہا ہے کہ ٹی وی سے وابستہ لوگوں نے فلم کے شعبے کی بحالی کیلئے جوقدم اٹھایا ہے وہ بہترین ہے۔ اب فلم سے وابستہ افراد کوبھی چاہئے کہ وہ ان کی سپورٹ کریں اوراس عمل میں ان کے شانہ بشانہ چلیں، تاکہ فلم کا شعبہ ترقی کرے۔میڈیا سے گفتگوکرتے ہوئے سارہ لورین نے کہا پاکستان فلم انڈسٹری کوترقی کی راہ پرآگے بڑھنے کیلئے ابھی بہت سی منزلیں طے کرنا ہوں گی۔

ابھی یہاں فلمسازی کا نیا دور شروع ہوا ہے لیکن بہت سے مسائل کا سامنا ہے، جس کے حل تک انٹرنیشنل مارکیٹ میں رسائی ممکن نہیں۔اداکارہ سارہ لورین نے کہا کہ اس وقت پاکستانی ڈراما اپنے عروج پرہے، جس طرح ماضی میں پاکستانی ڈرامے کوپسند کیاجاتا تھا، اسی طرح آج بھی پاکستانی ڈراما پاکستان اوردنیا کے بیشترممالک میں دیکھا اورپسند کیا جاتا ہے۔

(جاری ہے)

یہی وجہ ہے کہ نوجوانوں کی بڑی Aتعداد اس شعبے کو اپنا رہی ہے۔سارہ لورین نے کہا ہے کہ لیکن فلم واقعی ہی فنون لطیفہ کا سب سے مقبول ترین شعبہ ہے۔ اس لئے ہمارے بہت سے لوگ اس شعبے میں قسمت آزمائی کررہے ہیں۔ کچھ کوکامیابی ملی ہے اورکچھ اس کیلئے محنت کررہے ہیں۔ مگریہ کہنا درست نہیں ہے کہ پاکستان فلم انڈسٹری اب مکمل طورپرشائقین کے دل ودماغ پرچھا چکی ہے۔

کیونکہ ابھی اس کیلئے نوجوان فلم میکرز کوخاصی محنت کرنا ہوگی۔انہوں نے کہا کہ فلم کا انداز اس وقت دنیا بھرمیں تبدیل ہوچکا ہے۔ جس طرح فلمسازی کے شعبے میں تبدیلی آئی ہے، اسی طرح فلم کی کہانی، میوزک اورتکنیکی شعبے بھی تبدیل ہوئے ہیں، مگرہمارے ہاں ابھی تک اس طرح سے تبدیلی کوقبول نہیں کیا گیا ہے۔ یہی وجہ ہے کہ ہمارے ہاں فلم کا شعبہ تاحال مضبوط نہیں ہے۔