سعودی عرب کے ایک دیہات نے عالمی اعزاز حاصل کرلیا

معلوم ہوا ہے کہ اقوام متحدہ کے عالمی سیاحتی ادارے کی جانب سے بہترین سیاحتی دیہات کے ایوارڈ کا اعلان مئی میں ریاض میں منعقد ہونے والے ’سیاحت کی بحالی کے سمٹ‘ کے دوران کیا گیا تھا ، اس اقدام کا مقصد دیہی سیاحت کی شاندار مثالوں کو سامنے لانا ہے جن کے پہلو میں قدرتی اور ثقافتی عناصر ایک ساتھ دیکھنے کو ملتے ہیں جب کہ ان مقامات پر معاشرتی اقدار، طرز زندگی اور روایتی پیداواری طریقہ کار کو بھی تاحال محفوظ رکھا گیا ہے ۔

اس کے علاوہ بہترین سیاحتی دیہات کا یہ اقدام سیاحت کے ذریعے جامع کمیونٹی ڈویلپمنٹ کے لیے العلا فریم ورک پر بھی مبنی ہے جو گزشتہ سال G20 کی سعودی عرب کی صدارت کے دوران شروع کیا گیا ، اس کا مقصد پائیداری کے عزم اور سیاحت کو معاشروں میں مثبت تبدیلی کے لیے ایک قوت کے طور پر استعمال کرنے کی اہمیت کو اجاگر کرنا ہے۔ خیال رہے کہ رجال المع گاؤں عسیر کے پہاڑی علاقے میں ابہا شہر سے تقریباً 45 کلومیٹر مغرب کی جانب واقع ہے اور مملکت سعودی عرب کے متنوع ورثے اور ثقافت کی ایک منفرد مثال ہے ، یہ گاؤں قدرتی مٹی کے پتھر اور لکڑی سے بنے 60 کثیر المنزلہ محلات پر مشتمل ہے ، اس نے تاریخی تجارتی نیٹ ورکس کے مرکز میں ایک اہم مقام حاصل کیا جو یمن، بلا شام ، مکہ اور مدینہ سے جڑے ہوئے تھے۔