پاکستان انٹرنیشنل ائیرلائن اور پاکستان ہندو کونسل کے مابین مفاہمتی یاداشت پر دستخط

معاہدے کی رو سے پی آئی اے اور پاکستان ہندو کونسل ملک میں مذہبی سیاحت کے فروغ کیلئے مل کام کریں گے

ہفتہ 4 دسمبر 2021 15:59

اسلام آباد (اُردو پوائنٹ اخبارتازہ ترین - این این آئی۔ 04 دسمبر2021ء) پاکستان انٹرنیشنل ائیرلائن اور پاکستان ہندو کونسل کے مابین مفاہمتی یاداشت پر دستخط کر دیئے گئے ۔ ہفتہ کو یاداشت پر پی آئی اے کے سی ای او ائیر مارشل(ر) ارشد ملک اور پاکستان ہندو کونسل کے سرپرست اعلی ڈاکٹر رمیش کمار نے دستخط کئے ،معائدے کی رو سے پی آئی اے اور پاکستان ہندو کونسل ملک میں مذہبی سیاحت کے فروغ کیلئے مل کام کریں گے،پی آئی اے اندرون ملک، متحدہ عرب امارات اور دیگر ممالک سے ہندو یاتریوں کیلئے خصوصی پروازیں فراہم کریگا،پاکستان آنے والے ہندؤوں نے امیگریشن،سفری سہولیات سیکورٹی پر ڈاکٹر رمیش لال کا اداروں کو خراج تحسین پیش کیا ۔

ڈاکٹر رمیش کمار نے کہاکہ گزشتہ ہفتے آپریٹ ہونے والی پرواز اور بیرون ملک سے آنے والے مہمان پاکستانی حکام اور عوام کی مہمان نوازی سے بہت متاثر ہوئے۔

(جاری ہے)

ڈاکٹر رمیش کمار نے کہاکہ پی آئی اے اور دیگر اداروں کے ساتھ مل کر پاکستان میں مذہبی سیاحت کو فروغ ملے۔ سی ای او پی آئی اے ائیر مارشل ارشد ملک نے کہاکہ پاکستان میں کئی مذاہب کی اہم اور مقدس عبادت گاہیں ہیں،قومی ائیرلائن پاکستان کے مختلف شہروں میں ہندؤوں کے مذہبی مقاماتِ تک رسائی کے اقدامات میں تعاون کرے گی۔

انہوںنے کہاکہ پی آئی اے قائد اعظم کے مشن یعنی پاکستان تمام مذاہب کے ماننے والوں کے لئے پناہ گاہ ہے ، پر مکمل عمل درآمد کرے گی۔ انہوںنے کہاکہ پی آئی اے بحیثیت قومی ائیرلائن تمام مذاہب کے ماننے والوں کو اپنے جہازوں پر بلا تفریق خوش آمدید کہتی ہے۔