پاکستان کو گرے لسٹ میں رکھنےکا کوئی جواز نہیں بنتا

برسلز (اُردو پوائنٹ تازہ ترین اخبار۔ 08 دسمبر 2021ء) : وزیر خارجہ شاہ محمود قریشی کا کہنا ہے کہ ایف اے ٹی ایف کی جانب سے پاکستان کو گرے لسٹ میں رکھنے کا فیصلہ بلا جواز ہے، ایف اے ٹی ایف میں ایک طبقہ اس کی ساکھ کو متاثر کر رہا ہے۔ ایک نکتے پر خواہ مخواہ پاکستان کو گرے لسٹ میں رکھا گیا ہے۔ تفصیلات کے مطابق وزیر خارجہ شاہ محمود قریشی نے برسلز میں پاکستانی میڈیا کے نمائندوں سے گفتگو کرتے ہوئے کہا کہ پاکستان نے ایف اے ٹی ایف کے ایکشن پلان پربھرپورتعاون کیا، 2018ء میں دیے گئے ایکشن پلان پرپوری طرح عمل کیا۔

انہوں نے کہا کہ ایف اےٹی ایف میں ایک چھوٹا سا طبقہ اس کی ساکھ متاثر کر رہا ہے، یورپی یونین اوردیگرممالک اس سلسلے میں کردار ادا کریں۔ سیالکوٹ واقعہ سے متعلق بات کرتے ہوئے شاہ محمود قریشی نے کہا کہ سیالکوٹ کا واقعہ انتہائی افسوسناک ہے جس کا کوئی اخلاقی، انسانی جواز نہیں، اس واقعہ کے رونما ہونے سے پاکستان کو ندامت اٹھانا پڑی۔

(جاری ہے)

لیکن یہ بھی یاد رہے کہ عدنان بھی اسی مجمعے میں موجود تھا جہاں یہ دلخراش واقعہ ہوا، جس کے کردار کو وزیر اعظم عمران خان نے سراہا اور ان کے لیے تمغہ شجاعت کا اعلان کیا۔

ہمارے آئین اور قانون کے مطابق اقلیتوں کو تحفظ حاصل ہے، دین بھی اقلیتوں کے تحفظ کا درس دیتا ہے۔ انہوں نے کہا کہ سیالکوٹ واقعےکےذمہ داران کےخلاف کارروائی کا آغاز ہوچکا ہے۔ برسلز میں میڈیا سے گفتگو کرتے ہوئے وزیر خارجہ شاہ محمود قریشی نے کہا کہ اوورسیز پاکستانی ہمارا اثانہ ہیں انہوں نے دیار غیر میں محنت سے اپنی عزت بنائی ہے اور انہوں نے 30 ارب ڈالر ترسیل زر پاکستان بھجوائیں، ایک طبقہ پاکستان سے رقم لوٹ کر باہر چلا جاتا ہے اور دوسرا طبقہ یہاں مزدوری کر کے پاکستان میں رقم بھیجتا ہے، ہم نے بیرون ملک مقیم پاکستانیوں کے مسائل کے جلد حل کے لیے ایف ایم پورٹل کا آغاز کر دیا ہے، ہم نے اپنے تمام سفراء کو بیرون ملک مقیم پاکستانیوں کے ساتھ بہترین رویہ اپنانے کا درس دیا ہے۔