سیالکوٹ کا واقعہ انتہائی افسوسناک ہے، ہمارے آئین اور قانون کے مطابق اقلیتوں کو تحفظ حاصل ہے،

برسلز(اُردو پوائنٹ اخبارتازہ ترین - اے پی پی۔ 08 دسمبر2021ء) وزیر خارجہ مخدوم شاہ محمود قریشی نے کہا ہے کہ سیالکوٹ کا واقعہ انتہائی افسوسناک،جس کا کوئی اخلاقی، انسانی جواز نہیں،ہمارے آئین اور قانون کے مطابق اقلیتوں کو تحفظ حاصل ہے،دین بھی اقلیتوں کے تحفظ کا درس دیتا ہے،افغانستان میں حالات کشیدہ ہوئے تو اس کے مضمرات دور رس ہوں گے،اوور سیز پاکستانی ہمارا اثانہ ہیں۔

برسلز میں ،دورہ بیلجیم کے حوالے سے میڈیا نمائندگان سے گفتگو  کرتے ہوئے وزیر خارجہ نے کہا کہ بیلجیم کے کسی وزیر خارجہ کے ساتھ دس سال کے وقفے کے بعد دو طرفہ ملاقات ہوئی۔ہم نے دو طرفہ تجارت، سرمایہ کاری، سائنسی، تعلیمی اور زرعی شعبے میں تعاون کے فروغ سمیت باہمی دلچسپی کے امور پر بات چیت کی۔

(جاری ہے)

نیٹو ہیڈکوارٹرز میں سیکرٹری جنرل جینز اسٹولٹن برگ کے ساتھ ملاقات ہوئی۔

ہم نے دہشت گردی کے خلاف جنگ میں ایک دوسرے کے ساتھ تعاون کیا ہے اور ہماری خواہش ہے کہ یہ تعاون آئندہ بھی جاری رہے۔میں نے جنوبی ایشیا میں امن کو درپیش خطرات سے انہیں آگاہ کیا۔میں نے انہیں بتایا کہ افغانستان کی صورتحال پر قابو پانا سب کے مفاد میں ہے۔انہوں نے کہا کہ اگلے برس پاکستان اور یورپی یونین کے 60  سال مکمل ہونے پر ہم اسلام آباد میں کانفرنس کا انعقاد کریں گے۔

وزیر خارجہ نے کہا کہ میں نے ان کے سامنے وہ ٹھوس اقدامات رکھے جو پاکستان نے دہشت گردی، منی لانڈرنگ کے خلاف اٹھائے ۔انہوں نے کہا کہ سیالکوٹ کا واقعہ انتہائی افسوس ناک ہے جس کا کوئی اخلاقی، انسانی جواز نہیں،اس واقعہ  پر پاکستان کو ندامت اٹھانا پڑی۔اس وقت تک 132 کے قریب گرفتاریاں ہو چکی ہیں 26 ملزمان جن پر شبہ ظاہر کیا جا رہا ہے ان کو بھی گرفتار کیا جا چکا ہے۔

ہمارے آئین اور قانون کے مطابق اقلیتوں کو تحفظ حاصل ہے،دین بھی اقلیتوں کے تحفظ کا درس دیتا ہے۔وزیر خارجہ نے کہا کہ جہاں  ہندوستان میں  اقلیتوں کا جینا دو بھر کیا گیا،  وہاں پاکستان نے ہندوستان سمیت دنیا بھر میں سکھوں کیلئے کرتارپور راہداری کو کھولا  ۔پاکستان میں دیوالی اور کرسمَس کے تہواروں کو پوری مذہبی آزادی کے ساتھ منایا جاتا ہے۔

جہاں اقلیتوں کا تحفظ حکومت کی ذمہ داری بنتی ہے تو وہاں میڈیا کی بھی بہت اہم ذمہ داری  ہے۔انہوں نے کہا کہ ملک  عدنان بھی اسی مجمع میں موجود تھا جس کے کردار کو وزیر اعظم عمران خان نے سراہا اور ان کیلئے تمغہ   شجاعت کا اعلان کیا۔ وزیر خارجہ شاہ محمود قریشی نے کہا کہ اس وقت ہمارا مقصد افغانستان کو ابھرتے ہوئے اقتصادی اور انسانی بحران سے بچانا ہے ۔

یہی پیغام میں نے آج دیا ہے کہ اگر افغانستان میں حالات کشیدہ ہوئے تو اس کے مضمرات دور رس ہوں گے ۔انہوں نے کہا کہ اوور سیز پاکستانی ہمارا اثانہ ہیں انہوں نے دیار غیر میں محنت سے اپنی عزت بنائی ہے اور انہوں نے 30 ارب ڈالر کی  ترسیلات  زر پاکستان بھجوائیں۔ایک سوال کا جواب دیتے ہوئے وزیر خارجہ نے کہا کہ اشرف غنی کے بعد جب افغانستان میں طالبان کی عبوری حکومت قائم ہوئی تو ہندوستان نے ہمیں ذمہ دار ٹھہرانے کیلئے "سینکشن پاکستان  " کمپین چلائی لیکن انہیں ناکامی ہوئی ۔

مجھے یورپی یونین کے خارجہ امور کے سربراہ جوزف بوریل نے بتایا کہ یورپی یونین نے امدادی سامان پر مشتمل سات جہاز افغانستان بھجوائے ۔38 ملین افغانوں کی معاشی معاونت کیلئے تحرک کرنا ہو گا اور آج دنیا انگیج ہو چکی ہے اور افغانستان کے چھ قریبی ہمسایہ ممالک کا پلیٹ فارم قائم ہو چکا ہے۔ہم دنیا کو باور کروا رہے ہیں کہ پاکستان تنہا یہ  بوجھ نہیں اٹھا سکتا البتہ ہم مل کر ان چیلنجز سے نمٹ سکتے ہیں۔پاکستان پہلے ہی تقریبا چالیس لاکھ افغان مہاجرین کا بوجھ اٹھا رہا ہے۔