زرداری حکومت نہیں چھوڑیں گے، ن لیگ کو اندرونی تقسیم سے نکل جانا چاہیے،خواجہ آصف

پی ڈی ایم میں اجتماعی سوچ نہیں ہے، پی ڈی ایم میں جماعتی مفادات زیادہ ہیں، لیگی رہنما

جمعرات 16 دسمبر 2021 22:40

اسلام آباد (اُردو پوائنٹ اخبارتازہ ترین - این این آئی۔ 16 دسمبر2021ء) پاکستان مسلم لیگ (ن) کے مرکزی رہنما خواجہ محمد آصف نے دعویٰ کیا ہے کہ آصف زرداری کسی بھی قیمت پر سندھ کی حکومت نہیں چھوڑیں گے، ن لیگ کو اندرونی تقسیم سے نکل جانا چاہیے۔نجی ٹی وی کے مطابق سابق وزیر دفاع خواجہ محمد آصف نے کہا کہ پی ڈی ایم میں اجتماعی سوچ نہیں ہے، پی ڈی ایم میں جماعتی مفادات زیادہ ہیں۔

(جاری ہے)

خواجہ محمد آصف نے ایک سوال کے جواب میں کہا کہ آصف زرداری معاملہ فہم سیاستدان ہیں۔ ان کا کہنا تھا کہ آصف زرداری کسی بھی قیمت پر سندھ کی حکومت نہیں چھوڑیں گے۔انہوں نے دعویٰ کیا کہ اگر کوئی یہ سمجھتا ہے کہ پیپلزپارٹی پنجاب میں آرہی ہے تو وہ خود کو دھوکہ دے رہا ہے۔ انہوںنے کہاکہ پاکستان تحریک انصاف کو پتہ تھا کہ ان کو ضمنی انتخاب میں شکست ہو گی۔ن لیگ کے مرکزی رہنما خواجہ محمد آصف نے الزام عائد کیا کہ پیپلزپارٹی نے این اے 133 کے ضمنی انتخاب میں کچھ ووٹ خریدے تھے، ن لیگ کو اندرونی تقسیم سے نکل جاناچاہیے۔