اسلام آباد ،ڈکیتیوں کی وارداتوں میں پولیس مقابلے میں مشہور بلال گینگ کے دوڈاکو مارے گئے ، تین پولیس اہلکار زخمی ہوگئے

آئی جی اسلام آباد کا پولیس ریڈنگ ٹیم کے لئے ایک ایک لاکھ روپے انعام کا اعلان،احسن یونس نے زخمی اہلکاروں کی عیادت کی

ہفتہ 18 دسمبر 2021 13:21

اسلام آباد (اُردو پوائنٹ اخبارتازہ ترین - این این آئی۔ 18 دسمبر2021ء) وفاقی دارالحکومت اسلام آباد میں ڈکیتیوںکی وارداتوں میں پولیس مقابلے میں مشہور بلال گینگ کے دوڈاکو مارے گئے ، تین پولیس اہلکار زخمی ہوگئے۔

(جاری ہے)

ترجمان پولیس کے مطابق ڈکیت گینگ نے پولیس کو دیکھتے ہی فائرنگ کردی،پولیس مقابلے کے درمیان ایک پولیس جوان زخمی ہوگیا اور ڈاکو موقع سے فرار ہوئے تاہم پولیس ٹیموں نے ڈاکوئوں کا پیچھا کیا،ڈاکو بحریہ ٹائون فیز ایٹ میں ایک گھر میں محصور ہوگئے جس کے بعد پولیس نے گھر کو گھیرے میں لے لیا،ڈاکوئوں نے دوبارہ پولیس ٹیم پر فائرنگ کردی،دوبارہ پولیس مقابلے میں دو ڈاکو ہلاک ہوگئے،مقابلے میں اے ٹی ایس کے تین پولیس اہلکار بھی زخمی ہوگئے۔

دوسری جانب آئی جی اسلام آباد کا پولیس ریڈنگ ٹیم کے لئے ایک ایک لاکھ روپے انعام کا اعلان۔،آئی جی اسلام آباد احسن یونس نے زخمی اہلکاروں کی عیادت کی ،ترجمان کے مطابق شدید پولیس جوان کے لئے پانچ لاکھ روپے ، دیگر دو زخمی اہلکاروں کے لیے تین تین لاکھ روپے کا اعلان کیا گیا ۔ ترجمان کے مطابق آئی جی نے بہترین علاج معالجہ کی سہولتیں فراہم کرنے کی ہدایت کی ،پولیس کے جوانوں نے بڑی بہادری کے ساتھ مقابلہ کیا ہے جو قابل تحسین ہے ۔