شاہی خاندان سے علیحدہ ہونیوالے شہزادہ ہیری اور میگھن کی شہرت میں کمی واقع

لندن (اُردو پوائنٹ اخبارتازہ ترین - این این آئی۔ 03 جنوری2022ء) برطانوی شاہی خاندان سے علیحدگی اختیار کرنے والے شہزادہ ہیری اور میگھن مارکل کی شہرت میں کمی آگئی ہے جبکہ شہزادہ ولیم اور کیٹ مڈلٹن کی شہرت میں اضافہ ہورہا ہے۔بین الاقوامی رپورٹ کے مطابق برطانیہ میں کیے گئے ایک حالیہ سروے میں یہ بات سامنے آئی ہے کہ ہیری اور میگھن کی شہرت میں کمی آئی ہے۔

یہ سروے کے 23 سی30 دسمبر کے درمیان کیا گیا جس میں 1,567 برطانوی بالغ افراد نے حصہ لیا۔ اس سروے کے نتائج کے مطابق ، ملکہ برطانیہ 60 پلس ریٹنگز کے ساتھ شاہی خاندان کے مشہور ترین افراد میں پہلے، شہزادہ ولیم 55 پلس ریٹنگز کے ساتھ دوسرے، کیٹ مڈلٹن 47 پلس ریٹنگز کے ساتھ تیسرے، اور شہزادی این نے 39 پلس ریٹنگز کے ساتھ چوتھے نمبر پر ہیں،اس حوالے سے شاہی مبصر چارلی رے کا کہنا تھا کہ ہیری کو 0 ریٹنگز پر اور میگھن کی شہرت کا بار منفی 17ریٹنگز تک گرتے دیکھنا کوئی حیرت کی بات نہیں ہے۔

(جاری ہے)

ان کے علاوہ کئی سالوں کے اسکینڈل اور تنازعات کے بعد، شہزادہ اینڈریو منفی 50 ریٹنگز کے ساتھ شاہی خاندان کے افراد میں سب سے پیچھے ہیں۔واضح رہے کہ امریکی خاتون ورجینیا رابرٹس کی جانب سے الزام لگایا گیا ہے کہ برطانوی شہزادہ اینڈریو نے ان کے ساتھ جنسی زیادتی کی تھی۔ورجینیا نے نیویارک سٹی عدالت میں مقدمہ دائر کر دیا جس میں دعوی کیا گیا کہ شہزادہ اینڈریو نے بدنام زمانہ جیفری ایپسٹین کے نیویارک والے گھر میں اسے کمسنی میں جنسی حملے کا نشانہ بنایا تھا۔

عدالتی دستاویزات میں شہزادہ اینڈریو پر الزام لگایا گیا ہے کہ بیس سال قبل شہزادہ اینڈریو کو دولت، طاقت، مضبوط پوزیشن اور روابط نے اس قابل بنایا کہ انہوں نے ایک خوفزدہ، کمزور بچی کے ساتھ بدسلوکی کی جہاں اس کی حفاظت کے لیے کوئی موجود نہیں تھا۔