لمس جامشورو کی طرف سے سہون میں فری میڈیکل کیمپ منعقد کیا گیا،40کے قریب کنسلٹنٹس، ڈاکٹروں اور لمس کے عملے نے کیمپ میں حصہ لیا

حیدرآباد(اُردو پوائنٹ اخبارتازہ ترین - این این آئی۔ 22 جنوری2022ء) لمس جامشورو کی طرف سے فری میڈیکل کیمپ پریل شاہ گائوں، نزد ارازی، تحصیل سہون میں منعقد کیا گیا۔

(جاری ہے)

کیمپ میں 40 کے قریب کنسلٹنٹس، ڈاکٹروں اور لمس کے عملے نے، مختلف شعبوں سے کیمپ میں حصہ لیا، لیاقت یونیورسٹی آف میڈیکل اینڈ ہیلتھ سائنسز کے وائس چانسلر پروفیسر ڈاکٹر اکرام دین اجن کی ہدایت پر منعقدہ اس کیمپ میں پروفیسر مظفر علی شیخ،پروفیسر خالدہ ناز میمن،پروفیسر منظور علی لاکھیر،پروفیسر مشتاق علی میمن، ڈاکٹر کاشف شیخ،ڈاکٹر مشتاق شاہ،ڈاکٹر حافظ بشیر،ڈاکٹر کنول عباس بھٹی،ڈاکٹرشازیہ راجپر،ڈاکٹر گلزار عثمان اور فزیشنز، پیڈیاٹریشنز، کارڈیالوجسٹ، نیورو فزیشن، ENT ماہرین، اینڈو کرائنولوجسٹ، جلد کے ماہرین، کمیونٹی ڈینٹسٹری اور پبلک ہیلتھ پروفیشنلز شامل تھے جہاں مریضوں کا مفت چیک اپ مختلف قسم کے مفت ٹیسٹ اور فری ادویہ دی گئیں، اس موقع پر صحت کے متعلق آگاہی سیشنز بھی دئیے گئے جس میں بیماریوں سے بچا، حفاظتی ٹیکہ جات، ماں اور بچے کی صحت، صفائی ستھرائی، اور کورونا وائرس اور ویکسین کے متعلق عوام الناس کو طبی ہدایات دی گئیں، بعد ازاں پینے کے پانی کی ٹیسٹنگ بھی لمس واٹر لیبارٹری کی طرف سے کی گئی، کیمپ سے متعلق لمس ایف ایم ریڈیو پر پروگرام بھی نشر کئے گئے، عوام کی ایک بڑی تعداد نے شکریہ ادا کرتے ہوئے کہا ہے کہ بلاشبہ یہ ایک نیک امر اور صدقہ جاریہ کا کام ہے اور اس سے غریب عوام کی خدمت کر کے اللہ تعالی کی قربت نصیب ہوتی ہے شام گئے تک کیمپ میں سینکڑوں کی تعداد سے مریضوں نے استعفادہ حاصل کیا اور اس امید کا اظہار کیا کہ لمس آئندہ بھی علاقے کی محرومیوں کا سدباب کرنے کے ساتھ ساتھ غریب عوام کی خدمات پر مبنی پروگرام منعقد کرے گی جس سے غریب عوام خوشحالی کی طرف گامزن ہوں گے، اس میگا میڈیکل کیمپ کا انعقاد ضلعی انتظامیہ جامشورو، عبداللہ شاہ انسٹیٹیوٹ سیہون، پی پی ایچ آئی اور ڈی ایچ او جامشورو کے اشتراک سے کیا اور لمس نے مختلف امراض کے ماہرین اور کنسلٹنسی خدمات فراہم کیں۔