پی ایس ایل 7 سے پاکستان کرکٹ بورڈ کو 2 ارب روپے کا منافع ہوا

اس وقت پی سی بی کے پاس 15 ارب روپے کے ریزروز ہیں، اس سے قبل مالی سال میں 12 ارب روپے تھے، رپورٹ

جمعہ 13 مئی 2022 22:56

لاہور (اُردو پوائنٹ اخبارتازہ ترین - این این آئی۔ 13 مئی2022ء) پاکستان کرکٹ بورڈ (پی سی بی) کو پاکستان سپر لیگ ( پی ایس ایل) سیون سے دو ارب روپے سے زائد کا منافع ہوا ہے اور تمام فرنچائزرز کو آئندہ ہفتے اسٹیٹمنٹ بھجوا دی جائیں گی ،پاکستان کرکٹ بورڈ کے ریزرو 15 ارب روپے ہو گئے ہیں۔پاکستان کرکٹ بورڈ کے مطابق پی ایس ایل سیون سے نیٹ منافع تقریباً دو ارب روپے سے زائد کا ہوا ہے ،5 ٹیموں کو اچھا مالی فائدہ ہو گا۔

(جاری ہے)

پی ایس ایل کے گزشتہ سیزن کی تمام تفصیلات جلد فرنچائزرز کو موصول ہو جائیں گی، پی ایس ایل فائیو اور پی ایس ایل اکاؤنٹنگ نقصان 70 کروڑ روپے کا ہوا ہے، کووڈ 19 کی وجہ سے پانچویں اور چھٹے ایڈیشن میں ٹیموں کو مراعات دیں، تقریباً ایک ارب کے اخراجات برادشت کیے،اس وقت پی سی بی کے پاس 15 ارب روپے کے ریزروز ہیں۔ اس سے قبل مالی سال میں 12 ارب روپے تھے۔پی سی بی کا کہنا ہے کہ پی ایس ایل کے آٹھویں ایڈیشن کے میچز 4 وینیوز پر ہوں گے جن میں لاہور، کراچی، راولپنڈی اور ملتان شامل ہیں۔