پاکستان چائنا آن لائن ٹیکنالوجی گیٹ وے کا قیام جلد عمل میں لایا جائے گا، وانگ زی ہئی

بیجنگ (اُردو پوائنٹ اخبارتازہ ترین - اے پی پی۔ 20 مئی2022ء) پاکستان چائنا جوائنٹ چیمبر آف کامرس اینڈ انڈسٹری (پی سی جے سی سی آئی)کے صدر وانگ زی ہئی نے کہا ہے کہ پاکستان چائنا نالج پورٹل کی کامیابی کے بعد پاکستان چائنا آن لائن ٹیکنالوجی گیٹ وے کا قیام جلد عمل میں لایا جائے گا۔ یہ بات انہوں نے پی سی جے سی سی آئی میں ایک تھنک ٹینک سیشن کے دوران کہی۔

چینی ویب سائٹ چائنا اکنامک نیٹ کی رپورٹ کے مطابق انہوں نے کہا کہ انسانی وسائل کی ترقی کے لیے تکنیکی ترقی پی سی جے سی سی آئی کا بنیادی مقصد ہے۔ انہوں نے کہا کہ پاکستان چائنا نالج پورٹل کی کامیاب لانچنگ کے بعد ہم ایک آن لائن منصوبے پاکستان چائنا ٹیکنالوجی گیٹ وے کے قیام کے خواہاں ہیں ، یہ منصوبہ چین کے تعاون سے شروع کیا جائے گا جس کا بنیادی مقصد چین سے اضافی ٹیکنالوجی کی منتقلی ہے۔

(جاری ہے)

انہوں نے چین کے تعاون سے پاکستان میں تکنیکی ترقی کی رفتار کو تیز کرنے کا وعدہ کیا۔اس موقع پر پی سی جے سی سی آئی کے سینئر نائب صدر احسان چوہدری نے کہا کہ قابل تجدید توانائی کے شعبے میں چین سے مناسب ٹیکنالوجی کا حصول اور توانائی کے متبادل ذرائع جیسے سولر، نینو ٹیکنالوجی، ونڈ پاور اور ریور پاور پلانٹس کو چلانا ترجیحات میں شامل ہے۔

پی سی جے سی سی آئی نے نائب صڈر سرفراز بٹ نے کہا کہ چیمبر جدید ترین چائنیز انفارمیشن اینڈ میٹریل سنٹر قائم کرنے کا منصوبہ بنا رہا ہے جسے دو مرحلوں میں مکمل کیا جائے گا۔پہلے مرحلے میں سینٹر کی تشکیل اور دوسرے مرحلے میں چین سے پاکستان میں پیداواری سہولت کی منتقلی شامل ہے۔چیمبر کے سیکرٹڑی جنرل صلاح الدین حنیف نے بتایا کہ پاکستان چائنا ٹیکنالوجی گیٹ کے زریعے آن لائن تکنیکی کوسز بھی شروع کیے جائیں گے ۔ان کورسز کے تحت الیکٹرانک اور آٹوموٹیو ایڈوانسمنٹ، انشورنس، زراعت، ٹیکسٹائل، جوتے کی تیاری، کیمیکل، بیٹری ری سائیکلنگ پلانٹ اور رئیل سٹیٹ ایڈوائزری جیسے مختلف شعبوں سے متعلق عصری علم اور معلومات فراہم کی جائیں گی ۔