وزیراعلیٰ حمزہ شہباز سے جگنو محسن، بلال اصغر وڑائچ اورمعاویہ اعظم کی ملاقات، آٹا سستا کرنے کے اقدام کی تعریف

ہفتہ 21 مئی 2022 00:12

لاہور (اُردو پوائنٹ اخبارتازہ ترین - این این آئی۔ 20 مئی2022ء) وزیراعلیٰ حمزہ شہباز سے اراکین پنجاب اسمبلی جگنو محسن، بلال اصغر وڑائچ اورمعاویہ اعظم نے ملاقات کی، جس میں باہمی دلچسپی کے امور، سیاسی صورتحال اور عوام کو مہنگائی سے ریلیف دینے کیلئے اقدامات پر تبادلہ خیال کیاگیا۔ جگنو محسن، بلال اصغر وڑائچ اورمعاویہ اعظم نے آٹے کی قیمت میں ریکارڈ کمی پر وزیراعلیٰ حمزہ شہباز کے اقدام کی تعریف کی۔

جگنو محسن نے کہا کہ آپ نے آٹا سستا کر کے مہنگائی میں پسے عوام کو حقیقی ریلیف دیا ہی-بلال اصغر وڑائچ نے کہا کہ آٹا سستا کرنے کا اقدام قابل تحسین ہی-معاویہ اعظم نے کہا کہ آپ نے ثابت کیا ہے کہ آپ کا دل عام آدمی کے لئے دھڑکتا ہی- وزیراعلیٰ حمزہ شہباز نے کہا کہ عمران نیازی کے چار سالہ دور میں مہنگائی نے عام آدمی کی کمر توڑ دی -عمرانی سرکار عوام پر قہر بن کر ٹوٹی - عوام کے لئے درد دل نہ رکھنے والا حکمرانی کا حق نہیں رکھتا-ہماری حکومت نے چند روز میں آٹے کی قیمت میں کمی کر کے صوبے کے عوام کی مشکلات کم کی ہیں -ہماری سیاست کا محور مخلوق خدا کی خدمت ہے۔

(جاری ہے)

صوبے بھر میں 10 کلو آٹے کا تھیلا 650 روپے کی بجائے 490 روپے میں ملے گا۔عام آدمی کو 10 کلو آٹا تھیلے پر 160 روپے کا ریلیف دیا گیا ہے۔چینی اور گھی کی قیمتوں میں کمی لانے کیلئے بھی اقدامات کئے جا رہے ہیں۔