کام کا بوجھ شاہین آفریدی کے اعصاب پر اثر انداز، انگلینڈ سے جلد واپسی کی وجہ بنا

کائونٹی کرکٹ میں جسم میں اکڑاہٹ، درد، بخار اور تھکاوٹ جیسی علامات محسوس ہوئیں ، چند دن آرام سے صحت بہتر، ویسٹ انڈیز سے سیریز میں آرام دینے پرغور

ذیشان مہتاب اتوار 22 مئی 2022 11:34

کام کا بوجھ شاہین آفریدی کے اعصاب پر اثر انداز، انگلینڈ سے جلد واپسی ..

لاہور (اردو پوائنٹ تازہ ترین اخبار ۔ 22 مئی 2022ء ) کام کا بوجھ شاہین شاہ آفریدی کے اعصاب پر اثر انداز ہونے لگا ، ذرائع کے مطابق فٹنس مسائل اور طبیعت کی ناسازی کے سبب پیسر کی انگلینڈ سے اچانک وطن واپسی ہوئی۔ مسلسل تینوں فارمیٹس کی کرکٹ کھیلنے والے شاہین شاہ آفریدی کاؤنٹی کرکٹ میں مڈل سیکس کی نمائندگی کرر رہے تھے، اس دوران پیسر کو جسم میں اکڑاہٹ، درد، بخار اور تھکاوٹ جیسی علامات محسوس ہوئیں، ٹیم ڈاکٹر نے مزید میچز میں شرکت نہ کرنے اور زیادہ سے زیادہ آرام کا مشورہ دیا جس پر انھوں نے فوری وطن واپسی مناسب سمجھی۔

ذرائع کے مطابق گزشتہ ایک سال سے مسلسل انٹرنیشنل کرکٹ کھیلنے کے بعد کاؤنٹی میچز میں بھی شاہین اسی جذبے اور جوش کے ساتھ بولنگ کرتے رہے جو ان کی وجہ شہرت ہے، زور لگانے کی وجہ سے ان کا جسم اکڑاہٹ کا شکار ہوا جس کی وجہ سے بخار کی بھی شکایت ہوگئی۔

(جاری ہے)

اس صورتحال میں مڈل سیکس کاؤنٹی نے اعلان کیا کہ پیسر فوری طور پر پاکستان واپس جارہے ہیں، چند دن اہل خانہ کے ساتھ گزارنے اور ڈاکٹر کی ہدایت پر آرام کرنے کے بعد اب شاہین خود کو پہلے سے کافی بہتر محسوس کررہے ہیں، طبیعت بہتر ہونے پر وہ ہفتے کو لاہور پہنچ گئے، پی سی بی کا میڈیکل پینل ان کا مکمل چیک اپ کرے گا، مختلف ٹیسٹ بھی لیے جائیں گے، ان رپورٹس کے آنے پر ہی یہ فیصلہ ہوگا کہ وہ دوبارہ کب سے بولنگ شروع کرسکتے ہیں۔

شاہین آفریدی کا نام لاہور میں جاری کنڈیشننگ کیمپ میں شامل نہیں ہے۔ انھیں ویسٹ انڈیز کے خلاف ون ڈے سیریز میں بھی آرام دیا جاسکتا ہے۔