دعا زہرا کی سالگرہ کی ویڈیو پر والد کا ردعمل

بیٹی کی سالگرہ 27 اپریل کو تھی،مجھے نہیں معلوم کہ یہ ویڈیو کب کی ہے ،ویڈیو وائرل کرنے کا مقصد کیس کا دھیان دوسری جانب موڑنا ہے،مہدی کاظمی

جمعرات 26 مئی 2022 14:20

کراچی(اُردو پوائنٹ اخبارتازہ ترین - این این آئی۔ 26 مئی2022ء) کراچی سے لاہور آکر شادی کرنے والی دعا زہرا کی شوہر ظہیر احمد کے ساتھ اپنی سالگرہ منانے کی ویڈیو پر والد کا بیان سامنے آگیا۔دعا زہرا کے والد مہدی کاظمی نے کہا کہ میری بیٹی کی سالگرہ 27 اپریل کو تھی اور مجھے نہیں معلوم کہ یہ ویڈیو کب کی ہے لیکن ویڈیو وائرل کرنے کا مقصد کیس کا دھیان دوسری جانب موڑنا ہے۔

(جاری ہے)

مہدی کاظمی نے کہا کہ مجھے بہت سے لوگوں نے یہ بھی کہا کہ بچی کے ٹیسٹ کروائے جائیں تاکہ بچی کی ذہنی حالت معلوم ہوسکے۔انہوں نے کہا کہ میری بیٹی ان کے قبضے میں ہے اور وہ خدا نخواستہ کسی بھی طرح کی ویڈیو بناکر اپ لوڈ کرسکتے ہیں۔دعا کے والد نے کہا کہ جس خاتون نے یہ ویڈیو شیئر کی اسے سوچنا چاہیے تھا کہ وہ 13 سال کی بچی کی شادی کی حمایت کررہی ہے۔آخر میں انہوں نے کہا کہ اگر ظہیر احمد کے گھر والے اتنے سچے ہیں تو عدالت آئیں، سامنا کریں، عدالت میری خریدی ہوئی نہیں ہے جو میرے مطابق فیصلہ کرے گی۔واضح رہے کہ گزشتہ روز دعا زہرا کی شوہر ظہیر احمد کے ساتھ اپنی سالگرہ منانے کی ویڈیو سوشل میڈیا پر وائرل ہوئی تھی۔