راولپنڈی ، اسلا م آباد اور پنجاب سے زیادہ تعداد میں کارکنوں کو نہ لانے پر عمران خان پی ٹی آئی اراکین برہم

شیخ رشید اور راشد شفیق کتنے بند ے لیکر آئے ہیں ، سابق وزیر اعظم کنٹینر پر موجود رہنمائوں سے استفسار کرتے رہے

جمعرات 26 مئی 2022 23:51

راولپنڈی ، اسلا م آباد اور پنجاب سے زیادہ تعداد میں کارکنوں کو نہ لانے ..

اسلام آباد(اُردو پوائنٹ اخبارتازہ ترین - این این آئی۔ 26 مئی2022ء) پاکستان تحریک انصاف کے چیئر مین عمران خان نے پنجاب اور جڑواں شہر وںراولپنڈی اسلام آباد سے تحریک انصاف کے حامیوں اور کارکنوں کو بڑی تعداد میں نہ نکالنے پر پی ٹی آئی کے متعلقہ رہنمائوں پر سخت برہمی کا اظہار کیا ہے ۔ ذرائع کے مطابق پاکستان تحریک انصاف کے چیئر مین عمران خان جڑواں شہروں راولپنڈی اسلام آباد اور پنجاب سے زیادہ تعداد میں تحریک انصاف کے حامیوں اور کارکنوں کو نہ لانے پر اراکین پر برہم ہوگئے ۔

سابق وزیر اعظم کنٹینر پر موجود رہنمائوں سے سابق وزیر داخلہ شیخ رشید اور ان کے بھتیجے راشد شفیق کے بارے میں بھی استفسار کر تے رہے اور کہا کہ وہ کتنے بندے لیکر آئے ہیں جس کا کسی رہنماء کے پاس تسلی بخش جواب نہیں تھا ۔

(جاری ہے)

پی ٹی آئی چیئر مین نے اسلام آباد کی مقامی قیادت کے بارے میں بھی گلہ کرتے ہوئے افسوس کا اظہار کیا کہ اتنے اہم موقع پر بھی وہ کارکنوں کو بڑ ی تعداد میں نہ پہنچا سکے جبکہ پنجاب کے چند رہنمائوں کے سوا عمران خان اکثر رہنمائوں کے بارے میں انتہائی ناراض ہیں جنہوںنے پولیس کی گرفتاری سے بچ کرکارکنوں کو لانگ مارچ میں لانے کیلئے کوئی موثر حکمت عملی نہ اپنائی ۔

معلوم ہوا ہے کہ عمران خان اس سلسلے میں متعلقہ رہنمائوں سے باز پرس کا ارادہ رکھتے ہیں جبکہ ان کے قریبی ساتھیوں نے اس سلسلے میں باقاعدہ انکوائری کرانے کا مشورہ بھی دیا ۔