زیر تعمیر آبی وسائل کی بروقت تکمیل حکومت کی اولین ترجیح ہے، سید خورشید احمد شاہ

اسلام آباد (اُردو پوائنٹ اخبارتازہ ترین - اے پی پی۔ 17 جولائی2022ء) وفاقی وزیر برائے آبی وسائل سید خورشید احمد شاہ نے کہا ہے کہ زیر تعمیر آبی وسائل کی بروقت تکمیل حکومت کی اولین ترجیح ہے۔اتوار کو اپنے ایک بیان میں انہوں نے کہا کہ دیامر بھاشا ڈیم، داسو ڈیم، تھا کوٹ ڈیم اور پٹن ڈیم ملک میں توانائی کے بحران پر قابو پانے کے لیے ناگزیر ہیں۔ انہوں نے کہا کہ آبی وسائل کا دانشمندانہ استعمال ملک کے لیے ناگزیر ہے۔

وفاقی وزیر نے کہا کہ ملک ان آبی ذخائر کی تعمیر میں ایک لمحے کی تاخیر یا غفلت برداشت نہیں کر سکتا، یہ ملکی سالمیت کا معاملہ ہے۔ انہوں نے مزید کہا کہ ہم یہاں ایک سال سے ہیں لیکن اس دوران ہم جنگی بنیادوں پر کام کریں گے۔ وفاقی وزیر نے متعلقہ اداروں کو دیامر بھاشا ڈیم پر بننے والی ٹنل کی فوری فزیبلٹی بنانے کی ہدایت کی ہے، دیامر بھاشا ڈیم میں 6.4 ملین ایکڑ فٹ پانی ذخیرہ کرنے کی گنجائش ہوگی۔

(جاری ہے)

یہ ڈیم چلاس ٹاؤن سے 40 کلومیٹر نیچے کی طرف دریائے سندھ پر تعمیر کیا جا رہا ہے ۔ ڈیم کی نصب شدہ صلاحیت 4500 میگاواٹ سستی بجلی ہے۔داسو ہائیڈرو پاور پراجیکٹ ایک اہم منصوبہ ہے جو ملک میں سماجی و اقتصادی ترقی کے ایک نئے دور کا آغاز کرے گا اور عوام کو کم لاگت ہائیڈل بجلی فراہم کرکے پاکستان کی معیشت کو مستحکم کرے گا۔ اس کی نصب شدہ صلاحیت 4320 میگاواٹ سالانہ ہے۔اسی طرح تھاکوٹ ہائیڈرو پاور پراجیکٹ کی صلاحیت 4,000 میگاواٹ ہوگی اور قومی گرڈ کے لیے 21,300 GWh سالانہ توانائی پیدا کرے گی۔پٹن ہائیڈرو پاور پراجیکٹ کا پاور ہاؤس پتن گاؤں کے قریب بائیں کنارے پر اور اسلام آباد سے 305 کلومیٹر کے فاصلے پر واقع ہے۔ اس میں 2400 میگاواٹ کی صلاحیت موجود ہے۔