پی ٹی آئی کا 13اگست کو جلسے کا مقام تبدیل کرنے کا فیصلہ

تحریک انصاف اب اسلام آباد کے بجائے لاہور میں جلسہ کرے گی، پی ٹی آئی کا جلسہ لاہور ہاکی گراؤنڈ میں ہوگا

مقدس فاروق اعوان پیر 8 اگست 2022 17:25

پی ٹی آئی کا 13اگست کو جلسے کا مقام تبدیل کرنے کا فیصلہ

اسلام آباد(اُردو پوائنٹ، اخبار تازہ ترین، 8اگست 2022) پاکستان تحریک انصاف نے اسلام آباد کی بجائے لاہور میں جلسہ کرنے کا فیصلہ کر لیا۔چئیرمین پی ٹی آئی عمران خان کی زیر صدارت سیاسی کمیٹی کا اجلاس ہوا جس میں 13 اگست کے جلسے کے حوالے سے مشاورت کی گئی۔جلسے کے حوالے سے حتمی مشاورت کے لیے عمران خان نے پارٹی کو آج طلب کیا تھا۔اجلاس میں پاکستان تحریک انصاف نے 13 اگست کو جلسے کا مقام تبدیل کرنے کا فیصلہ کر لیا۔

تحریک انصاف اب اسلام آباد کے بجائے لاہور میں جلسہ کرے گی۔پی ٹی آئی جلسہ لاہور ہاکی گراؤنڈ میں ہوگا۔اس سے قبل تحریک انصاف نے 14 اگست کو اسلام آباد میں جلسہ کرنے کا فیصلہ کیا تھا ۔سابق وزیراعظم و پی ٹی آئی چیئرمین عمران خان کی زیر صدارت پارٹی کی سیاسی کمیٹی کا اجلاس ہوا جس میں ملک کی موجودہ سیاسی صورتحال پر غور کیا گیا۔

(جاری ہے)

ذرائع کے مطابق عمران خان کے 9 حلقوں میں ضمنی انتخابات سے متعلق قانونی امور کا جائزہ لیا گیا جبکہ ارکان اسمبلی کے استعفوں سے متعلق پی ٹی آئی کی قانونی حکمت عملی پر بریفنگ دی گئی۔

ذرائع کا کہنا ہے کہ پی ٹی آئی قانونی ٹیم نے عدالتوں میں دائر درخواستوں پر پیش رفت سے بھی آگاہ کیا۔ذرائع نے بتایا کہ اجلاس میں فیصلہ کیا گیا کہ تحریک انصاف 14 اگست کو اسلام آباد کے پریڈ گراؤنڈ میں جلسہ کرے گی۔اس حوالے سے عمران خان کا کہنا تھاکہ موجودہ حکومت ہر میدان میں بری طرح ناکام ہوچکی ہے لہٰذا حکومت فوری عام انتخابات کی تاریخ دے۔تاہم آج پارٹی مشاورت کے بعد عمران خان کی جانب سے اہم فیصلہ کیا گیا ہے جس کے تحت اب جلسہ لاہور میں ہو گا جس میں ایک لاکھ افراد کو لانے کا ٹاسک دیا گیا ہے۔دوسری جانب اپوزیشن لیڈر راجہ ریاض کا کہنا ہے کہ عمران خان کی13 اگست کواسلام آباد جلسہ کی کال فتنہ فساد پھیلانے کیلئے ہے۔