شاہ محمود قریشی خود تو اسمبلی میں جاتے نہیں ، کیا ان کی صاحبزادی اسمبلی میں جائیں گی، یوسف رضا گیلانی

کمشنر ملتان نے پی ٹی آئی کے دباؤ میں آکر چھٹی کیلئے درخواست دی ہے جس کا الیکشن کمیشن آف پاکستان کو فوری نوٹس لینا چاہیے، سابق وزیر اعظم

پیر 8 اگست 2022 22:44

ملتان (اُردو پوائنٹ اخبارتازہ ترین - این این آئی۔ 08 اگست2022ء) سابق وزیر اعظم سید یوسف رضا گیلانی نے کہا ہے کہ حیران ہوں پی ٹی آئی والے ضمنی انتخابات کیوں لڑ رہے ہیں شاہ محمود قریشی خود تو اسمبلی میں جاتے نہیں ، کیا ان کی صاحبزادی اسمبلی میں جائیں گی،ملتان میں الیکشن کمیشن مکمل طور پر آزاد ہے، کمشنر ملتان نے پی ٹی آئی کے دباؤ میں آکر چھٹی کیلئے درخواست دی ہے جس کا الیکشن کمیشن آف پاکستان کو فوری نوٹس لینا چاہیے۔

9 ویں محرم الحرام کے جلوس کے دوران میڈیا سے گفتگو کرتے ہوئے یوسف رضا گیلانی نے کہا کہ ماضی میں جو معاہدے ہوئے ان پر عملدر آمد کرانا ریاست کا کام ہے۔ ملکی خوشحالی اور مضبوطی کیلئے ملک میں آئین اور قانون کی حکمرانی ہونی چاہئے۔ سید یوسف رضا گیلانی نے کہا کہ میں متفقہ طور پر وزیراعظم بنا تھا لیکن مجھے 30 سیکنڈز کی سزا دی گئی اور پھر ازخود نوٹس لیتے ہوئے مجھے نااہل کردیا گیا۔

(جاری ہے)

انہوں نے کہا کہ آئین کے مطابق کام ہوگا تو ملک مضبوط ہوگا۔ عمران خان کے دور میں آصف زرداری ، میاں نواز شریف سمیت کئی سیاسی رہنماؤں نے جیلیں کاٹی ہیں۔ یوسف رضا گیلانی کا کہنا تھا کہ کمشنر اور ڈپٹی کمشنر پر پی ٹی آئی کی طرف سے سخت دباؤ ہے اسی لئے کمشنر نے چھٹی کیلئے درخواست دی ہے۔ الیکشن کمیشن کو اس کا فوری نوٹس لینا چاہئے۔