معروف انجینئرنگ کمپنی ڈیسکون ، برآمدی ترقی کی راہ پر تیزی سے گامزن

کراچی (اُردو پوائنٹ اخبارتازہ ترین - این این آئی۔ 16 اگست2022ء) پاکستان میں صف اول کی معروف انجینئرنگ کمپنی، ڈیسکون انجینئرنگ لمیٹڈ (DEL) نے مالی سال 2021-22ء کے دوران اندرو ن وبیرون ملک چلنے والے بڑے منصوبوں کی بدولت اپنی آمدن میں ریکارڈاضافہ کیا ہے ۔ ڈیسکون انجینئرنگ لمیٹڈ کے تیار کردہ آلات قطر، عراق، بحرین، متحدہ عرب امارات، عمان، مشرقی یورپ اور پاکستان میں تیل و گیس کے شعبہ میں فراہم کیے گئے ہیں۔

ڈیسکون نے سعودی عرب، بحرین، متحدہ عرب امارات، یمن، عمان اور روس میں ریفائنریوں کے لیے بھی ساز و سامان تیار کیاہے۔ کمپنی کی انجینئرنگ سروسزکے ذیلی ونگ، ڈیسکون انجینئرنگ سروسز اینڈ ٹیکنالوجی (DEST) نے بھی سعودی عرب میں کلائنٹس سروس میںبہترین کارکردگی کا مظاہرہ کیاہے۔

(جاری ہے)

بیرون ملک بشمول مشرق وسطیٰ اور مشرقی یورپ میں کامیابی کے بعد ڈیسکون انجینئرنگ لمیٹڈ اب جنوب مشرقی افریقہ، وسطی ایشیاء اور مشرقی یورپ کی مارکیٹوں میں قدم جمانے کی منصوبہ بندی کر رہا ہے۔

یہ صنعت کے چیلنجوں سے نمٹنے کے لیے اپنی صلاحیتیوں کو بڑھا رہاہے ۔ ڈیسکون انجینئرنگ لمیٹڈ کے چیف ایگزیکٹیو آفیسر تیمور سعیدنے کہاکہ،’’مالی سال2021-22ء کے حوصلہ افزاء نتائج ہمارے ملازمین کی محنت ولگن کا منہ بولتا ثبوت ہیں جنہوں نے ہمارے منصوبوں کو عملی جامہ پہنایا اور مشکل وقت میں ہمارے کلائنٹس کی خدمت کی۔کورونا وباء کے دوران پیش آنے والے اتار چڑھاؤ کی وجہ سے ہماری سپلائی چین پر دباؤ بڑھ رہا ہے ،اس کے باوجود ڈیسکون انجینئرنگ لمیٹڈ اپنی پیداواری صلاحیت اور کارکردگی کو بڑھانے کے لیے اپنے سروسز پورٹ فولیو سے فائدہ اٹھانا جاری رکھے گا۔

ہماری مسلسل کوشش رہے گی کہ اندرون اور بیرون ملک سماجی و اقتصادی ترقی میں اپنا حصہ ڈالیں۔ ہماری پائیدار کاروباری ترقی ، مستقبل میں ہمارے اسٹریٹجک منصوبوں کے کام آتی ہے۔‘‘