خانہ کعبہ ورچول ایگزی بیشن کا آغاز‘ فرزندانِ توحید کیلئے زیارت کی سعادت کا آسان طریقہ

نمائش میں خانہ کعبہ کی رسمِ غسل میں استعمال شدہ آلات اور سامان بھی زیارت کے لیے پیش کردیا گیا

ساجد علی بدھ 17 اگست 2022 12:58

خانہ کعبہ ورچول ایگزی بیشن کا آغاز‘ فرزندانِ توحید کیلئے زیارت کی ..

مکہ مکرمہ ( اُردو پوائنٹ اخبارتازہ ترین ۔ 17 اگست 2022ء ) سعودی عرب میں حرمین شریفین انتظامیہ نے خانہ کعبہ ورچول ایگزی بیشن کا افتتاح کردیا، نمائش میں خانہ کعبہ کی رسمِ غسل کے دوران استعمال ہونے والے آلات اور سامان بھی رکھا گیا ہے، فرزندانِ توحید بارکوڈ کو سکین کرکے مقدس اشیاء کی زیارت کی سعادت حاصل کرسکتے ہیں۔ سعودی خبر رساں ایجنسی ایس پی اے کے مطابق مقدس مساجد کے امور کے جنرل پریذیڈنسی کے تحت نمائشوں اور عجائب گھروں کے امور کے سیکریٹری انجینیئر ماہر الزھرانی نے بتایا کہ اس نمائش کا مقصد مسجد الحرام اور مسجد نبوی کے زائرین کو سعودی خدمات سے متعارف کرانا ہے تاکہ زائرین کو پیش کی جانے والی سہولیات اور انہیں حج وعمرہ و زیارت میں دی جانے والی آسانیوں کا بھی علم ہو۔

(جاری ہے)

ڈیجیٹل ایگزیبیشن کے ڈائریکٹر جنرل ریان المسعودی نے بتایا کہ نمائش میں رسم غسل کے دوران خانہ کعبہ کے فرش اور اس کی دیواروں کی صفائی اور دھلائی میں استعمال ہونے والے آلات اور سامان بھی رکھا گیا ہے، غسل کعبہ میں استعمال ہونے والا تمام سامان پیتل کا بنا ہوا ہے، سالانہ رسم کے لیے تمام چیزیں خاص طور پر تیار کرائی گئی ہیں، اس سلسلے میں ورچول ٹیکنالوجی اور مصنوعی ذہانت سے استفادہ کیا گیا۔

بتایا گیا ہے کہ خانہ کعبہ کو غسل دینے کی عظیم سعادت سعودی بادشاہ یا ان کی جانب سے نامزد کردہ نمائندے کو حاصل ہوتی ہے، اس بار خادم حرمین شریفین شاہ سلمان کی طرف سے ولی عہد، نائب وزیراعظم اور وزیر دفاع شہزادہ محمد بن سلمان نے خانہ کعبہ کی سالانہ رسمِ غسل کی قیادت کی، ولی عہد کے ہمراہ سعودی وزیر کھیل شہزادہ عبدالعزیز بن ترکی بھی مسجدالحرام پہنچنے، اس موقع پر مقدس مساجد کے امور کے جنرل پریزیڈنسی کے سربراہ شیخ عبدالرحمن السدیس نے ان کا استقبال کیا۔

مسلمانوں کے مقدس ترین مقام کی سالانہ غسل کی تقریب کا اہتمام آبِ زمزم سے کیا گیا جس میں عود اور دیگر مسحور کن عطر ملائے گئے جب کہ خانہ کعبہ کی اندرونی دیواروں کو گلاب اور کستوری کے عطروں میں ڈوبے سفید کپڑے سے صاف کیا گیا اسی طرح آبِ زمزم میں عطر ملا کر فرش پر چھڑک کر ہاتھوں اور کھجور کے پتوں سے مسح کیا گیا۔