مستحق سیلاب متاثرین میں اب تک 50 ارب روپے سے زائد کی رقم تقسیم کی جا چکی ہے، شازیہ مری

کراچی(اُردو پوائنٹ اخبارتازہ ترین - این این آئی۔ 28 ستمبر2022ء) وفاقی وزیر اور چیئرپرسن بینظیر انکم سپورٹ پروگرام شازیہ عطا مری نے کہا ہے کہ مستحق سیلاب متاثرین میں اب تک 50 ارب روپے سے زائد کی رقم تقسیم کی جا چکی ہے۔اپنے جاری کردہ بیان میں وفاقی وزیر اور چیئرپرسن بینظیر انکم سپورٹ پروگرام شازیہ عطا مری نے کہا کہ وزیراعظم محمد شہباز شریف نے سیلاب متاثرین میں 25, 25 ہزار روپے فی خاندان دینے کا اعلان کیا تھا جس کی زمہ داری بینظیر انکم سپورٹ پروگرام کو سونپی گئی تھی۔

انہوں نے کہاکہ کہ آج تک بینظیر ایمرجنسی کیش امداد کے تحت سیلاب متاثرہ20 لاکھ خاندانوں میں 25000روپے فی خاندان امدادی رقم تقسیم کی جاچکی ہے۔انہوں نے کہا کہ مستحق سیلاب متاثرین میں اب تک 50 ارب روپے سے زائد کی رقم تقسیم کی جاچکی ہے اور ابھی تک سلسلہ جاری ہے۔

(جاری ہے)

شازیہ مری نے کہا کہ پاکستان اس وقت سیلاب کے باعث بہت ہی سنگین حالات کا سامنا کر رہا ہے، ہماری پوری کوشش ہے کہ دیگر جو لوگ رہ گئے ہیں ان تک بھی 25 ہزار روپے کی امدادی رقم پہنچائی جائے۔

انہوں نے کہا کہ امدادی رقم سے ناجائز کٹوتی کرنے والوں کے خلاف سخت ایکشن لیا، ملوث کرمنل عناصر کو گرفتار بھی کروایا ہے، متاثرین کویہ رقم شفاف طریقے سے پہنچائی جائے اوربدعنوان عناصر سے کوئی بھی رعایت نہ برتی جائیگی۔ وفاقی وزیرنے کہا کہ میں خود بینظیر انکم سپورٹ پروگرام کی قائم شدہ کیمپوں کا دورہ کرکے سارے عمل کو مانیٹر کر رہی ہوں ، جہاں بھی کٹوتی کی ثبوتوں کے ساتھ شکایت موصول ہوتی ہیں وہاں پر فوری کاروائی عمل میں لائی جاتی ہے۔انہوں نے کہا کہ مشکلاتوں اورمواصلاتی نظام درہم برہم ہونے کیباوجود بینظیر انکم سپورٹ پروگرام کی ٹیمیں کشتیوں میں سوار ہوکر متاثرین میں امدادی رقم تقسیم کر رہے ہیں۔