ایران: مہسا امینی کی ہلاکت پر احتجاج کا تیسرا ہفتہ، ہلاکتوں کی تعداد 83 ہوگئی

تہران (اُردو پوائنٹ اخبارتازہ ترین - آن لائن۔ 30 ستمبر2022ء) ایران میں 22 سالہ مہسا امینی کی ہلاکت کے خلاف احتجاج تیسرے ہفتے میں داخل ہوگیا ہے ، ہلاکتوں کی تعداد 83 ہوگئی۔غیرملکی خبررساںادارے کے مطابق تہران اور اصفہان سمیت مختلف شہروں میں احتجاجی مظاہرے جاری ہیں، جبکہ مشہد میں رات گئے مظاہرین اور سیکیورٹی فورسز کے درمیان جھڑپیں ہوئیں۔ انسانی حقوق کے گروپ کے مطابق مظاہروں میں ہونے والی ہلاکتوں کی تعداد 83 ہوگئی ہے۔

(جاری ہے)

دوسری جانب انسانی حقوق کے عالمی ادارے ایمنسٹی انٹرنیشنل نے کہا ہے کہ ایران جان بوجھ کر مظاہرین کے خلاف طاقت کا استعمال کر رہا ہے۔مذمتی بیانات سے بالاتر ہوکر کسی عالمی ایکشن کے بغیر زیادہ لوگوں کے مارے جانے کا خطرہ ہے، ایمنسٹی انٹرنیشنل نے کہا ہے کہ ایرانی حکام نے ملک گیر احتجاج کو بے رحمی سے کچلنے کیلئے اپنی مشینری کو متحرک کردیا ہے۔ایرانی پولیس کی زیر حراست مہسا امینی دل کا دورہ پڑنے سے 16 ستمبر کو انتقال کر گئی تھی، 22 سالہ مہسا امینی کو تہران میں اسکارف نہ پہننے پر حراست میں لیا گیا تھا۔